Gưl tal êlâo atăt gŏ sang ti să Ƀuôn Đon, čar Dak Lak, nao ti Nha Trang čar Khánh Hòa mdei săn, ayŏng Y Trang Niê hdơ̆k kdơ̆k nao dlăng êa ksĭ, êa poh yă, nao hiu čhưn ktuê êlan êa ksĭ lehanăn ƀơ̆ng dŭm mta mnơ̆ng jăk mơ̆ng êa ksĭ. Ayŏng brei thâo:

“Hmei hriê tinei dlăng ƀuôn prŏng ksĭ Nha Trang, ksĭ Dốc Lết, dlăng êa ksĭ tinei amâo êlam, êa poh yă wưng anei amâo ktang ôh mbĭt anăn hmei dưi ƀơ̆ng lu mta mnơ̆ng hlăm êa ksĭ. Tơdah kluôm ktuê êlan pral Khánh Hòa - Ƀuôn Ama Thuôt dưi ngă leh, kâo bi mĭn hdră mnia mblei lehanăn tuê hiu čhưn srăng lu hĭn. Bi êlan ară anei gơ̆ lu kčŭn čư̆ đei”.

Mơ̆ng boh sĭt mơ̆ng tuê hiu čhưn, dŭm anôk bruă duh mkra hiu čhưn ti Khánh Hòa lehanăn Dak Lak dôk pral mđĭ hdră bi hgŭm mkŏ mjing mnơ̆ng mlir krĭng. Nguyễn Minh Trí, Anôk bruă hiu čhưn ênguê Minh Trí Travel, čar Dak Lak brei thâo:

“Sa ktuê êlan srăng mâo lu anôk truh hĭn, ktuê êlan anăn mâo êa ksĭ, mâo dliê, mâo dhar kreh, mâo mnơ̆ng ƀơ̆ng huă. Klei bi mguôp Dak Lak lehanăn Khánh Hòa jing 1 wăl anôk kluôm ênŭm. Hlăm 3 hruê, tơdah tuê truh ti Khánh Hòa dưi mnei êa ksĭ, srăng dưi nao truh krĭng nah Ngŏ čar nao dlăng Sang čuôr Nghinh Phong, nao krĭng Yŭ Dak Lak dlăng čư̆ dliê, drai êa, ênao êa”.

Mơ̆ng boh sĭt anăn, lu anôk bruă duh mkra ti dua alŭ wăl anei mphŭn mkŏ mjing dŭm hdră mkra mjing hdră hiu čhưn mdê bi krĭng, pŏk mlar wăl anôk tui ksiêm kơ tuê hiu čhưn ênguê bi hrô kơ hdră nao čhưn bi dŭm anôk mđê mdê. Bruă dua car dưi bi mŭt mbĭt mơ̆ng 4 čar êlâo adih mjing leh sa “Pŏk rup hiu čhưn ênguê” lu êa mil, mâo angĭn mđiă, mâo êa ksĭ, mâo čư̆ dliê lehanăn wăl anôk dhar kreh dŭm djuê ana. Grăp krĭng mâo klei găl mdê mdê, tơdah bi mguôp mbĭt srăng mjing hdră bi đru hdơ̆ng găp, đru kơ hdră hiu čhưn ênguê lu jơr, tuê srăng dôk sui hĭn, bi liê lu hĭn. Anei ăt jing tur knơ̆ng čiăng kơ anôk bruă duh mkra mkra dŭm tour “sa ktuê êlan – lu anôk hiu čhưn”, ƀrư̆ bi mlih hdră hiu čhưn krĭng wăl mơ̆ng klei ba yua klei găl jing hdră mđĭ kyar hơĭt kjăp.

Kơiăng Nai prŏng, nai prĭn Lê Chí Công, Khua Adŭ bruă hiu čhưn ênguê, Sang hră gưl prŏng Nha Trang bi mklă, Lăn dap kngư – Dhŭng kwar krah jing wăl anôk mđĭ kyar mdê hjăn, bi mklin dliê – êa ksĭ- čư̆ čhiăng lehanăn knhuah dhar kreh mnuih djuê ƀiă. Khă snăn, klei gun kpăk prŏng ară anei jing anôk bruă êlan klông nah gŭ mkŏ Khánh Hòa -  Dak Lak ka bi knar, bruă du mdiăng luič lu hruê mmông, hmei kơ hdră hiu čhưn mlir krĭng. Mbĭt anăn, klei kƀah mnuih mă bruă, klei thâo ba yua kdrăp mrâo ăt dôk ngă kpăk hdră mđĭ kyar bruă hiu čhưn ênguê mơ̆ng krĭng.

Lê Chí Công lač, dŭm boh kdrŭt phŭn mâo Klei bi kƀĭn tal XIV mơ̆ng Đảng bi mklă jing “Klei mblang” kơ dŭm klei êdu kƀah anei.

“Êlâo hĭn, hluê kâo jing mjing klei bi hgŭm anôk bruă nah gŭ srăng mjing dŭm ktuê êlan lehanăn wăl anôk hiu čhưn ênguê mlir krĭng, bi hgŭm tŭ dưn plah wah krĭng čư̆ čhiăng lehanăn ktuê hang ksĭ, mơ̆ng anăn srăng bi sui mmông dôk hlăp čhưn, mdĭ ênoh bi liê, mđĭ ai bi ktưn mơ̆ng anôk hiu čhưn. Tal dua, mđĭ klei thâo mnuih mă bruă, mguôp hŏng knhuah dhar kreh – lăn êa mơ̆ng krĭng, srăng đru mđĭ hnơ̆ng tŭ jăk hdră hiu čhưn, mtrŭt mđĭ bruă hiu čhưn êpul êya lehanăn mjing hdră duh ƀơ̆ng hơĭt kjăp kơ mnuih ƀuôn sang alŭ wăl.

Thâo klă hdră êlan mtrŭn prŏng mơ̆ng Klei bi kƀĭn tal XIV, êpul êya anôk bruă duh mkra Khánh Hòa, dôk gĭr mkŏ dăp hdră mă bruă, mđing truh kơ dŭm mta mnơ̆ng mâo hnơ̆ng tŭ jăk, mđĭ hnơ̆ng tŭ jăk hdră bruă lehanăn bi hgŭm mđĭ boh tŭ yuôm. Khua Êpul hgŭm bruă hiu čhưn ênguê čar Khánh Hòa Phạm Minh Nhựt brei thâo:

“Hmei ba yua jih klei găl mâo, si srăng ngă, čiăng mkŏ mjing dŭm hdră hiu čhưn ênguê, mđĭ boh tŭ hdră mkăp klei ngă bruă. Si srăng ngă, tuê hiu čhưn ênguê truh kơ Khánh Hòa srăng lu hĭn, hŏng mta kñăm mđĭ kyar 2 ênoh mrô hluê Hdră mtrŭn mơ̆ng Klei bi kƀĭn tal XIV. Brei lŏ mkŏ dăp wĭt, bi mlih mrô, mđĭ kyar bruă duh mkra kluôm hluê hdră mtah lehanăn hơĭt kjăp. Anei amâo djŏ jing hdră msir ƀiădah jing klei čiăng êdi brei ngă.

Khánh Hòa jing čar mâo hdră duh mkra kluôm mơ̆ng hdră hiu čhưn ênguê ti krĭng Dhŭng kwar Krah – Lăn dap kngư ƀiădah klei găl ka dưi yua jih, boh nik ară anei dôk kƀah anôk čhĭ mnơ̆ng prŏng, bruă duh mkra mlam ka klă nik. Hdră hiu čhưn ênguê Khánh Hòa ka dưi mdĭ lar bruă klam ktrâo atăt, đru kơ alŭ wăl djiêu gah.

Hŏng mta kñăm drông 18,8 êklăk čô tuê, ênoh hrui wĭt 77 êbâo êlai prăk hlăm thŭn 2026, Khánh Hòa dôk čang hmăng mtrŭt mđĭ hdră hiu čhưn ênguê jing bruă duh mkra phŭn, đru mguôp yuôm bhăn kơ wưng đĭ kyar 2 ênoh mrô mơ̆ng čar. Nguyễn Long Biên, kơiăng khua knơ̆ng bruă sang čư̆ êa čar Khánh Hòa brei thâo:

“Brei drei bi mguôp, mkŏ mjing mnơ̆ng jiă knhuah 2 dhar kreh mdê mdê. Drei mâo lu klei găl kyua mâo lu knhuah dhar kreh, alŭ wăl čiăng mđĭ kyar. Ti anăp srăng mđing kơ lu hdră bruă, pŏk thiăm gưl phiơr, lu ktuê êlan mrâo. Mkŏ mjing dŭm hdră bruă hnơ̆ng prŏng, mtrŭt mđĭ hdră hưn mthâo klei hiu čhưn ênguê”.

Hlăm boh klei mrâo, klei bi mguôp krĭng Lăn dap kngư – Dhŭng kwar krah amâo djŏ knŏng jing hdră msir ti anăp, ƀiădah jing hdră êlan sui thŭn. Hlăk anôk bruă nah gŭ dưi ruh mtlaih, anôk bruă duh mkra brei mlih mrâo klei mĭn, alŭ wăl brei mjing wăl anôk đĭ kyar, hiu čhưn ênguê Khánh Hòa lehanăn kluôm Dhŭng kwar Krah dưi “Kpưn đĭ kbưi hĭn”, mđĭ kyar hơĭt kjăp lehanăn đru mguôp ƀrư̆ hruê ƀrư̆ prŏng hĭn kơ bruă duh mkra krĭng lehanăn ala čar./.