Mơ̆ng 6h mmăt, leh ktit pui, wăl anôk ƀuôn prŏng Mlam sang mnia Nhỏ mphŭn mčhĭt mơuăt. Êbeh 60 kiôt čhĭ mnơ̆ng lu mta, mâo mnơ̆ng ƀơ̆ng huă, êa mnăm, mnơ̆ng jăk alŭ wăl lehanăn mnơ̆ng djă pioh. Ai êwa hiu čhưn yan mnga, blei mprăp akŏ thŭn amâo djŏ knŏng ba klei mơak kơ mnuih ƀuôn sang ƀiădah lŏ đru mtrŭt mđĭ hdră mnia mblei, hdră hiu čhưn mlam ti alŭ wăl. Adei Lê Trúc Thảo Nguyên, hơ̆k kdơ̆k brei thâo: “Kâo ruah truh ti ƀuôn prŏng mlam Sang mnia Nhỏ kyua anei jing sa knăm rang čhĭ mnơ̆ng tal êlâo pŏk ti ƀuôn hgŭm Pleiku, wăl anôk tinei prŏng, mơak, dŭm mta mnơ̆ng jăk êdi kâo ƀuh"

Amâo djŏ knŏng phung mda asei, lu gŏ sang ăt ruah tinei jing anôk truh akŏ yan mnga. Amai Võ Thị Thu Diễm, dôk ti ƀuôn hgŭm Diên Hồng brei thâo:“Kâo truh ti Ƀuôn prŏng mlam Sang mnia Nhỏ ƀuh wăl anôk tinei lu mnuih, mčhĭt mơuăt. Lu mta mnơ̆ng ƀơ̆ng jăk hŏng phung hđeh, gŏ sang hiu čhưn. Ƀuôn prŏng mlam mâo bi msiam jăk êdi dlăng”

Mrâo mŭt ngă bruă ƀiădah ƀuôn prŏng mlam sang mnia Nhỏ pral jing leh gru kruăk hlăm hdră mđĭ kyar bruă duh mkra mlam ti alŭ wăl. Boh nik hlăm dŭm hruê akŏ yan mnga mrâo, hnơ̆ng tuê đĭ, hdră mnia mblei mčhĭt mơuăt, ba klei čang hmăng kơ sa thŭn mrâo ngă bruă jăk găl.

Ti sa anôk čhĭ mnơ̆ng ƀơ̆ng djuê ana, Amai Ksor H’Khal mkăp dŭm mta mnơ̆ng ƀơ̆ng huă jăk mơ̆ng mnuih Jarai, msĕ si điŏ brông, mnŭ ăm, čĭm ŭn ăm, čĭm êmô ăm, hla ƀlang đeh kan krô. Amai brei thâo: “Hŏng tuê hiu čhưn lu snei kâo mơak êdi kyua kâo pô dưi hưn mthâo truh kơ phung tuê thâo kơ ƀơ̆ng mnơ̆ng jăk mơ̆ng ƀuôn sang Gia Lai ăt msĕ mơh mnơ̆ng ƀơ̆ng mơ̆ng mnuih djuê ana Jarai. Hmei ktưn hưn kyua mâo čar mjing klei găl hưn mthâo mnơ̆ng jăk mơ̆ng alŭ wăl pô, sui hruê mlan arăng srăng thâo lu hĭn kơ pô.

Ƀuôn prŏng mlam Sang mnia Nhỏ dưi mkŏ mjing giăm êa Hội Phú, sa wăl anôk lăn mnga siam ti krah Pleiku mbĭt anăn jing krĭng mnuih ƀuôn sang dôk sui thŭn, siă suôr hŏng gru kruăk hƀuê ênuk êlâo kơ hruê mtlaih êngiê. Đặng Toàn Thắng, Khua knơ̆ng bruă sang čư̆ êa ƀuôn hgŭm Pleiku brei thâo: “Mkŏ mjing anôk hiu êbat jơ̆ng adiê mlam čiăng mđĭ kyar bruă duh mkra hiu čhưn adiê mlam hluê mta kñăm mơ̆ng Hdră mtrŭn Klei bi kƀĭn bruă Đảng čar Gia Lai lehanăn Hdră mtrŭn Klei bi kƀĭn bruă Đảng ƀuôn hgŭm Pleiku. Mơ̆ng anăn mjing wăl anôk čiăng kơ phung tuê hiu čhưn hlăm lehanăn êngao čar Gia Lai srăng mâo sa wăl anôk tui ksiêm êjai adiê mlam ti ƀuôn hgŭm Pleiku lehanăn krĭng ƀuôn prŏng Pleiku (hđăp).

Ƀuôn prŏng mlam Sang mnia Nhỏ mâo lu mnuih truh kơ krah mklam. Anei amâo djŏ knŏng jing anôk blei mprăp, hlăp lêñ, ƀiădah lŏ jing wăl anôk bi mguôp êpul êya, hưn mthâo kơ dhar kreh lehanăn mtrŭt mđĭ kyar bruă hiu čhưn ênguê mơ̆ng ƀuôn prŏng krĭng čư̆ čhiăng Pleiku. Hlăm ai êwa yan mnga krĭng čư̆ čhiăng, ai êwa hdĭp mrâo dôk mčhĭt mơuăt, ƀuăn sa thŭn mrâo mâo lu klei bi mlih jăk siam./.