Tui si klei hâo mdah mơ̆ng knơ̆ng bruă sang čư̆ êa čar Daklak, dŭm mlan akŏ thŭn, bruă tuh tia mnia mblei lehanăn hiu čhưn ênguê mâo leh dŭm knhuang đĭ kyar jăk. Ênoh tue hiu čhưn ênguê đĭ truh mkrah mkă hŏng wưng anei thŭn dih. Klei êdah êdi jing ênoh mâo ba wĭt êbeh 5.000 êklai prăk, đĭ êbeh 35% mkă hŏng wưng anei thŭn dih.

Siămdah mbĭt hŏng dŭm boh tŭ dưn jăk mâo leh, čar Daklak ăt dôk tuôm hŏng lu klei dleh dlan. Nguyễn Thiên Văn, Khua knơ̆ng bruă sang čư̆ êa čar Daklak jing jai, mtă leh kơ dŭm alŭ wăl, lehanăn dŭm êpul êya bruă mđing ruh mgaih jih klei dleh dlan, bi pral duh bi liê ngăn prăk kơ bruă knŭk kna, anăp truh kơ klei bi leh dŭm ênoh čuăn kơ bruă mđĭ kyar duh mkra ala ƀuôn mơ̆ng jih thŭn 2025.

“Dlăng kluôm jing hơĭt, ƀĭadah klei bi liê ngăn prăk mơ̆ng ODA amâomâo hơĭt ôh, drei dlăng nik lehanăn si srăng ngă čiăng dưi mâo hơĭt ngăn prăk ODA. Kơ klei ba wĭt ngăn prăk gưl čar jing 1.140 êklai, lehanăn gưl kdriêk jing 1.600 êklai prăk. Mơ̆ng ară anei truh kơ jih thŭn gưl čar adôk 600 êklai dơ̆ng, bi gưl kdriêk bi mâo 700 êklai prăk snăn kơh djăp hdră kčah. Hŏng gưl čar jing hơĭt, hjăn gưl kdriêk, leh jao wĭt kơ să sĭt nik srăng dleh dưi lŏ hrui. Klei anei brei lŏ bi mkă tĭng hĕ bi djŏ.”

Ti anôk bi kƀĭn bruă Đảng čar Daklak tal 33 (pŏk mlar) phung bi ala mâo leh klei trông čhai kơ lu bruă prăk êmiêt kơ klei bi kƀĭn prŏng Đảng čar gưl 18, wưng păn bruă 2025–2030. Tui si klei hâo mdah bruă kđĭ čar klei bi kƀĭn prŏng Đảng čar wưng tinăp, čar Daklak kơh dưi djăp 17 ênoh čuăn phŭn hlăm bruă duh mkra, ala ƀuôn, kơ wăl hdĭp mda, kơ bruă răng mgang klei êđăp ênang, lehanăn mkŏ mjing Đảng. Mbĭt anăn bi mklă 5 êpul bruă čuăn, hdră mă bruă čiăng mâo klei đĭ kyar pral lehanăn kjăp.

Klei bi kƀĭn mđing trông čhai lehanăn mâo klei bi tŭ ư prŏng hŏng jih jang hdră kčah leh kơ klei mkŏ mjing bruă Đảng čar Daklak leh bi mŭt dua boh čar Daklak lehanăn Phú Yên. Snăn, leh klei dăp wĭt, kluôm čar Daklak mrâo srăng mâo truh 108 êpul bruă Đảng hlăm bruă Đảng čar, hŏng ênoh jih jang giăm 140.000 čô đảng viên.

Nguyễn Đình Trung, Khua bruă Đảng čar Daklak, mtă hlăm klei mkŏ mjing hră mơar kơ klei bi kƀĭn, dŭm gưl dhar bruă, alŭ wăl lŏ dơ̆ng kăp kčĕ, đru mguôp kơ akŏ klei bi kƀĭn prŏng lehanăn mta phŭn kơ dŭm bruă ngă. Hlăm anăn bruă dưn yua, mđĭ hĭn klei găl mơ̆ng dua boh čar Daklak lehanăn Phú Yên leh bi mŭt mbĭt brei nao mđrĭng hŏng klei mđĭ kyar kluôm dhuôm:

“Bi ksiêm duah čiăng kơ dưn yua êjai jih jang klei găl mơ̆ng čar Daklak lehanăn čar Phú Yên hđăp, dua lĕ bi dưn yua jih dŭm bruă čuăn phŭn  mơ̆ng dua boh čar, amâo mâo djŏ knŏng mđing đei kơ klei duh mkra đei ôh, ƀiădah mđĭng wăt kơ klei hdĭp mda ala ƀuôn, kơ bruă răng mgang klei êđăp ênang, kriê pioh knhuah gru dhar kreh pô amâo mâo dưi lui ôh. Kơ klei čiăng mđĭ kyar pral bi mâo êpul knuă druh mă bruă knhăk, bi djŏ hŏng klei gưl dlông čoh čuăn, klei mnuih ƀuôn sang čang hmăng, bi tơdah ăt dôk tui tiŏ klei bhiăn hđăp sĭt nik amâo mâo srăng mâo klei đĭ kyar ôh. Thŭn 2025 dăp wĭt êpul khua kiă kriê jing sa klei bi mlih prŏng, ƀiădah hjăn čar Daklak ăt msĕ mơh klei dăp wĭt mnuih mă bruă jing sa aklei bi mlih prŏng mơh./.