Klei kƀĭn bi klă lu hdră mtrŭn yuôm bhăn hlăm klei mđĭ kyar bruă duh mkra ala ƀuôn mơ̆ng čar hlăm wưng kơ anăp. Blŭ bi ruê̆ klei kƀĭn, aduôn Huỳnh Thị Chiến Hoà, khua Êpul gơ̆ng bruă ƀuôn sang čar Dak Lak mñă klă, bruă sang čư êa čar, dŭm gưl, dhar bruă, alŭ wăl srăng dlăng kơ bruă klam mđĭ kyar bruă duh mkra ala ƀuôn, răng mgang klei êđăp ênang jing bruă klam mđing tal êlâo hlăm 6 mlan knhal jih thŭn anei.

Mbĭt hŏng anăn, Êpul gơ̆ng bruă ƀuôn sang čar mtă kơ dŭm dhar bruă, gưl bruă mtrŭt mđĭ bruă hâo hưn truh hŏng jih jang mnuih ƀuôn sang dŭm hdră êlan, klei mĭn mơ̆ng Đảng, klei bhiăn ala čar kơ dŭm hdră êlan mđĭ kyar bruă duh mkra ala ƀuôn krĭng mnuih djuê ƀiă, hdră êlan bi mguôp djuê ana mơ̆ng Đảng, knŭk kna čiăng kơ mnuih ƀuôn sang sa ai hluê ngă. Hlăm gưl kƀĭn, Êpul gơ̆ng bruă ƀuôn sang čar Dak Lak ăt bi klă 6 hdră mtrŭn kơ hdră bhiăn, 10 hdră mtrŭn hjăn leh anăn bi klă lu mta phŭn yuôm bhăn mkăn hŏng klei bi sa ai.