Khua gĭt gai Đảng Tô Lâm mơĭt klei êmuh hrăm truh kơ êpul êya mnuih Việt Nam ti ala tač êngao, čih yap klei bi mguôp hŏng lăn čar, ai tiê bruă klam hŏng lăn čar, ƀuôn sang. Khua gĭt gai Đảng Tô Lâm lač klă, Đảng leh anăn Knŭk kna sa anăn nanao hŏng klei mĭn mă mnuih ƀuôn sang jing phŭn, jing mta kñăm, jing boh kdrŭt  leh anăn ai dưi đĭ kyar, hlăm anăn êpul êya mnuih Việt Nam ti ala tač êngao jing sa kdrêč amâodưi ktlah mơ̆ng djuê ana Việt Nam, jing ai dưi yuôm bhăn hlăm klei bi mguôp djuê ana  hlăm ênŭm đĭ kyar mrâo.

Khua gĭt gai Đảng Tô Lâm hmăng hmưi, mnuih ƀuôn sang drei ti ala tač êngao ngă djŏ nanao hdră bhiăn ti anôk pô dôk, bi mguôp mkŏ mjing êpul êya đĭ kyar kjăp ktang, mđĭ kơhưm mơ̆ng êpul êya, hur har kriê pioh, hưn mdah dhar kreh Việt Nam, mkŏ mjing rup jăk siam kơ lăn čar, anak mnuih hlăm mah jiăng tar rŏng lăn.