Nao mbĭt hŏng khua gĭt gai Đảng Tô Lâm mâo khua knŭk kna Phạm Minh Chính, Khua bruă kƀĭn ala Trần Thanh Mẫn mbĭt hŏng lu phung khua kiă kriê gưl dlông hlăm Đảng, Knŭk kna drei. Việt Nam lehanăn Campuchia mkŏ mjing klei mjĕ mgiăm dua nah hlăm hrue 24/6/1967, ară anei Việt Nam jing ala čar hgŭm dôk tal 3 kơ Campuchia, ti tluôn China, lehanăn Mi. klei Khua gĭt gai Đảng Tổng Bí thư Tô Lâm nao čhưn anei jing wưng phung khua kiă kriê hyuă kjăp hĭn klei bi mguôp, bi kjăp bruă kđi čar, mtrŭt hlue ngă klei leh bi tŭ ư, lŏ mtrŭn agha êlam hĭn klei bi mguôp plah wah dua Đảng, dua knŭk kna, mjing boh kdrŭt atăt klei bi mguôp Việt Nam-Campuchia đĭ kyar hlăm knhuang prŏng hĭn.

Êlâo anăn, hlăm hdră nao čhưn ti Lao, Khua gĭt gai Đảng Tô Lâm mâo leh hdră bi trông hŏng Khua gĭt gai Đảng, Khua lăn čar Lào Thongloun Sisoulith; bi tuôm hŏng Khua knŭk kna Lào Sonexay Siphandone, Khua anôk bruă kƀĭn ala Lào Saysomphone Phomvihane; drông Khua bruă mặt trận Lao mkŏ mkra ala čar Kikeo Khaykhamphithoune; nao čuă Anôk bi ala Việt Nam ti Lao lehanăn bi tuôm hŏng êpul mnuih Việt Nam ti Lao… ƀri gưl anei, Khua knŭk kna Phạm Minh Chính bi tuôm hŏng Khua knŭk kna Lào Sonexay Siphandone; Khua bruă kbĭn ala Trần Thanh Mẫn bi tuôm hŏng Khua bruă kƀĭn ala Lào Saysomphone Phomvihane; phung khua dŭm Phŭn, dhar bruă dua ala čar bi trông, mđĭ klei bi hgŭm dua tĭng. Hlăm hdră nao čhưn, mkŏ mjing leh knăm bi mklă hră mơar bi hgŭm yuôm bhăn mơ̆ng dŭm Phŭn, dhar bruă, alŭ wăl Lao lehanăn Việt Nam hlăm bruă mjuăt bi hriăm, hdră bhiăn, bi hgŭm alŭ wăl, mjing tur knơ̆ng kjăp lehanăn boh kdrŭt mrâo, bi sĭt bruă hluê ngă hdră êlan phŭn hlăm klei bi mjĕ hgŭm bruă plah wah dua ala čar./