Hdră bruă êlan dơ̆ng êran pral Hoài Nhơn - Quy Nhơn hlăm êlan êa ksĭ êran pral Dưr – Dhŭng nah Ngŏ ară anei bu leh jih jang bruă rŭ mdơ̆ng. Anôk bruă kriê dlăng hdră bruă 85 brei thâo dôk bi leh hră mơar knhal tuč čiăng ba kdrêč anei hlăm klei ba yua hlăm  gưl Tết Nguyên đán. Ayŏng Nguyễn Trọng Quân  - mnuih mă bruă Knơ̆ng bruă 479 Hoà Bình hơ̆k mơak leh hŏng êpul ngă bruă knơ̆ng bruă bi leh bruă klam, đru ba hdră bruă truh hdră kčah hnưm.

“Lač kơ bruă knuă hmei ăt suăi êmăn snăn mâo klei mđing uêñ mơ̆ng phung knuă druh snăn hmei ăt gĭr bi leh mmông mă bruă thiăm leh anăn mlam čiăng bi leh djŏ hnơ̆ng hdră bruă kyua anăn ayŏng adei dôk gak răng leh anăn gĭr bi leh jăk bruă klam jao”.

Mâo ƀô̆ mta hlăm hdra bruă êlan dơ̆ng êran pral Chợ Mới - Bắc Kạn, Đại tá Võ Khắc Hùng, K’iăng Khua Êpul kahan 12, Knơ̆ng bruă rŭ mdơ̆ng Trường Sơn brei thâo: Hdră bruă găn leh anôk dleh dlan, čư̆ čhiăng, hŏng boh taih 28,8 km, ênoh bi liê êbeh 5.550 êklai prăk. Phung kahan Awa Hồ dôk gĭr mđĭ pral hnơ̆ng hdră bruă.

“Lĭng kahan Trường Sơn hmei ktưn hưn snăk, mâo Đảng, knŭk kna jao lu hdră bruă phŭn, msĕ si dŭm hdră bruă êlan dơ̆ng êran pral. Hmei bi mklă anei jing hdră bruă phŭn gĭr rŭ mdơ̆ng “3 gưl 3 êpul msĕ si ai tiê phung lĭng kahan čiăng bi leh”.

Anăn dŭm anôk bruă duh mkra Việt đru mguôp hlăm klei kñăm bi leh êbeh 3.000 km êlan dơ̆ng êran pral wưng anei mâo Khua phŭn bruă rŭ mdơ̆ng Trần Hồng Minh lu blư̆ mñă, hŏng klei đăo knang leh anăn ktưn hưn, msĕ si: Phương Thành, Đèo Cả, Sơn Hải, Lizen, Vinaconex, Trường Sơn…Dŭm anôk bruă hlue ngă djŏ klei ƀuăn rơ̆ng, yua klei kreh knhâo kdrăp mrâo, mđĭ mmông mă bruă, êpul, tăp năng “tŭ klei bi luč liê kơ pô” kyua hnơ̆ng hdră bruă. Msĕ si, Phạm Văn Khôi,  Khua Êpul gơ̆ng kiă kriê Knơ̆ng bruă Phương Thành brei thâo, anôk bruă ñu mâo 4 hdră bruă êlan dơ̆ng êran pral. Hlăm anăn, mâo 2 hdră bruă wưng 2 mâo Vũng Áng - Bùng leh anăn Vân Phong - Nha Trang.

Lŏ wĭt hŏng kwar Dhŭng, nao ti krĭng dap mnai krông Cửu Long, Trần Văn Thi,  Khua Anôk bruă kriê dlăng hdră bruă Mỹ Thuận- mnuih siă suôr hŏng bruă êlan klông dŭ mdiăng giăm 30 thŭn – hmư̆ ñu yăl dliê kơ hruê mlan dŭm êbâo čô mnuih mă bruă, phung mkra mjing bruă êlan klông gĭr ktưn bi leh hdră bruă phŭn ala čar, hŏng ai ktang, klei thâo phung mâo bruă klam “nao êlâo pŏk êlan” hlăm dŭm ktuê êlan êran pral, mơ̆ng Cần Thơ truh Cà Mau:

Hŏng êpul mkra mjing, mnuih mă bruă Việt Nam, hmei gĭr bi lông čiăng bi leh dŭm hdră bruă hnưm ba yua čiăng duh kơ mnuih ƀuôn sang, duh kơ lăn čar leh anăn ăt jing čiăng mđĭ kyar bruă duh mkra. Mbĭt hŏng klei mkŏ mjing anôk bruă nah gŭ kơ lăn čar snăn klei thơ̆ng kơ bruă kdrăp mrâo mơ̆ng êpul, mơ̆ng klei kriê dlăng truh kơ đru kčĕ, rŭ mdơ̆ng ăt dưi mđĭ kyar. Hmei tưn hưn ƀuh wưng đĭ kyar mơ̆ng dhar bruă leh anăn mbĭt hŏng klei đĭ kyar lăn čar, hmei ƀuh ktưn hưn snăk.”

Dŭm êtuh êbâo čô mnuih, hŏng ai tiê bi lông “dưi hŏng adiê hjan mđiă, ngă bruă jih hruê mlam, têt, ngă yang hruê, ngă mlam” čiăng ba dŭm hdră bruă êlan dơ̆ng êran pral truh hdră kñăm djŏ hnơ̆ng amâodah êbeh hnơ̆ng. Čih hlue si klei blŭ mơ̆ng K’iăng nai prŏng, nai prĭn Trần Chủng,  Khua Êpul hgŭm phung duh bi liê kơ hdră bruă êlan klông êlan dơ̆ng Việt Nam tơdah lač kơ ai tiê, klei duh myơr phung mkra mjing leh dŭm hdră bruă mâo ênoh yuôm êtuh thŭn:

“Brei drei bi êdah klei mni lač jăk kơ phung mkra êlan klông Awa Hồ lač leh “ jing phung mkra êlan.” Mkra êlan suăi êmăn snăk”. Suăi snăk. Kyua anăn brei drei mni lač jăk kơ digơ̆. Mni lač jăk kơ phung mkra êlan mrâo mrang ară anei mkra leh kơ drei dŭm hdră bruă êlan dơ̆ng êran pral êđăp ênang, mđĭ klei mđĭ kyar bruă duh mkra, rơ̆ng êđăp ênang kơ mnuih ƀuôn sang leh anăn jăk kơ wăl hdĭp mda”.

Êbeh 3.500km êlan dơ̆ng êran pral bi leh, pŏk boh kdrŭt mrâo kơ klei mđĭ kyar lăn čar leh anăn thiăm klei đăo knang hlăm klei kñăm 5.000km êlan dơ̆ng êran pral hlăm thŭn 2030. Nah tluôn ktuê êlan prŏng siam jing êa kơhŏ, klei thâo leh anăn ai tiê duh myơr kjăp dŭm êtuh êbâo čô mkra mjing, mnuih mă bruă, kahan Trường Sơn leh anăn dŭm anôk bruă duh mkra Việt Nam mă bruă jih hruê mơak, têt hat, hruê mlam hlăm anôk mă bruă. Dŭm ktuê êlan hruê anei jing tur knơ̆ng kơ êdei anăp – čiăng kơ Việt Nam êdah kdlưn kjăp ktang, nao pral hĭn, kbưi hĭn hlăm ktuê êlan nao hlăm ênuk kpưn đĭ djuê ana./.