Hlăm klei bi kƀĭn, phung bi ala lač hră čih Hdră bruă bi leh 3 bruă klam phŭn hlue si klei mkŏ leh anăn mkŏ mjing 6 êpul hdră msir hlue ngă hdră čuăl mkă. Lu phung bi ala tač, brei hdră bruă ksiêm dlăng bi klă kơ dliê kmrơ̆ng, mnơ̆ng dhơ̆ng hdĭp, klei bi mlih yan adiê leh anăn djah djâo khăng, boh klei sang hră mtô bi hriăm leh anăn klei kreh knhâo kdrăp mrâo čiăng mâo hdră msir bi djŏ guôp.

Brei lač klă hĭn kơ boh klei duh mkra lŏ hma ti čar leh anăn bi klă hdră kñăm mơ̆ng wưng 2021-2030 jing knhuang mkŏ mjing tur knơ̆ng kơ klei mđĭ kyar lŏ hma hlue hdră mrâo mrang, hơĭt kjăp, djŏ guôp hŏng klei găl leh anăn klei thâo mkra mjing mơ̆ng alŭ wăl.

Hră čih Hdră bruă čuăl mkă čar Dak Lak wưng 2021-2030, hnơ̆ng trah dlăng truh thŭn 2050 dôk dưi mkŏ mjing mă klei blŭ mguôp kluôm čar čiăng bu leh mdah kơ gưl mâo klei dưi bi mklă. Hdră bruă kčah hdră kñăm truh thŭn 2050 Dak Lak jing čar mâo klei dưi đĭ kyar man dưn hlăm kluôm ala./.