Hlăm hdră mă bruă ti Ƀuôn prŏng Hồ Chí Minh djŏ wưng Têt djuê ana – Yan mnga Bính Ngọ 2026, hlăm ai êwa mơak Đảng – mơak yan mnga, hlăm tlam 11/2, Khua knŭk kna  Phạm Minh Chính nao čuă, hơêč hmưi phung khua kiă kriê hđăp mơ̆ng Đảng, Knŭk kna lehanăn čuh brui mngưi kơ phung khua kiă kriê Đảng, Knŭk kna ti Ƀuôn prŏng Hồ Chí Minh djiê leh. Khua knŭk kna Phạm Minh Chính lehanăn êpul mă bruă nao čuă, hơêč hmưi Têt Khua lăn čar hđăp Nguyễn Minh Triết; Trương Tấn Sang; Khua knŭk kna hđăp Nguyễn Tấn Dũng. Ti dŭm anôk nao čuă, ƀri thŭn mrâo Bính Ngọ 2026, Khua knŭk kna Phạm Minh Chính hơêč hmưi kơ phung khua kiă kriê hđăp mơ̆ng Đảng, Knŭk kna mbĭt hŏng gŏ sang suaih pral yâo mơak, tŭ jing, čang hmăng kơ phung khua kiă kriê Đảng, Knŭk kna lŏ dơ̆ng mđing dlăng, đru mguôp klei blŭ yuôm bhăn kyua hdră mđĭ kyar mơ̆ng ala čar, kyua klei trei mđao, yâo mơak mơ̆ng mnuih ƀuôn sang.

Nao čuă, hơêč hmưi Têt lehanăn čuh brui mngưi kơ phung khua kiă kriê Đảng, Knŭk kna djiê leh, Khua knŭk kna Phạm Minh Chính hơêč hmưi gŏ sang Ayang Khua gĭt gai Đảng êlâo adih Nguyễn Văn Linh, Ayang Khua Êpul hgŭm Khua phŭn bruă Phạm Hùng, ayang Khua knŭk kna Võ Văn Kiệt, ayang Khua knŭk kna Phan Văn Khải suaih pral, êđăp ênang, yâo mơak, drông Têt Bính Ngọ 2026 kuh kŭm, trei m đao, hơ̆k  mơak, đĭ kyar, sah mdrŏng./.