Leh dŭm hruê ƀơ̆ng tết, Nguyễn Viết Đồng ti ƀuôn hgŭm Ea Kao, čar Dak Lak nao ti đang kphê čiăng dlăng hnơ̆ng ap msah lăn, bi êran đĭng kriê aruăt êa, čŏng mkăp brei êa kơ ana pla mjing. Ñu brei thâo, đang pla mjing mơ̆ng gŏ sang ñu hlăm wưng bi diê, krih djăp êa srăng đru kơ ana rông boh, mđĭ hĭn boh mnga hlăm wưng kơ anăp.

“Čiăng mâo yan hrui pe lu boh mnga, dŭm bruă tal êlâo jing yuôm sơnăk, čiăng krih djŏ wưng brei mnga blang, đuôm boh. Hmei hmêč ƀơ̆ng tết, dŭm hruê akŏ thŭn mrâo čiăng krih êa kphê. Hmăng hmưi yan mga mrâo Bính Ngọ jăk mơak, kphê thŭn anei mâo boh lu.”

Ăt leh dŭm hruê tết, Nguyễn Văn Trường ti să Čư̆ Pơ̆ng čar Dak Lak lo wĭt hŏng bruă kriê dlăng đang kphê 1,5ha mơ̆ng gŏ sang čiăng mprăp kơ gưl krih êa tal dua, wưng yuôm đru kơ ana krơ̆ng boh diê leh anăn čăt đĭ jăk. Čiăng čŏng rơ̆ng kơ êa krih, ñu duh bi liê ênao êa hŏng ƀaih mbĭt hŏng kdrăp krih êa mkiêt mkriêm.

:“Ară anei hlăm să, grăp sang bi kčao ênao êa, blei ƀaih lang čiăng bi kdơ̆ng êa. Mkra ênao jing tŭ dưn êdi. Mâo êa mnuih ƀuôn sang pom kdŏng hlăm ênao. Êjai truh knhal jih yan bhang yua êa anei krih kơ ana pla mjing.”

           Dak Lak ară anei mâo hlăm brô 213.000ha kphê, lu jing ti nah yŭ Dak Lak. Kyua čŏng mkăp êa krih, yua klei kreh knhâo mrâo mrang leh anăn rơ̆ng kơ klei kriê dlăng hơĭt, kphê wưng thŭn 2025 - 2026 lŏ dơ̆ng mâo ênoh, hnơ̆ng êbeh 570 êbâo tôn, ba wĭt hnư prăk lu kơ phung pla mjing.

Êjai ƀĭng ngă lŏ hma trŭn kơ bruă kriê dlăng ana pla mjing, bi phung trah mă kan hdang ti Ngŏ Dak Lak lŏ nao ti ea ksĭ leh dŭm hruê mơak drông tết. Tĭ kdrŭn ksĭ kan Đông tác, ƀuôn hgŭm Phú Yên, čar Dak Lak, lu kŭm păn wah kan ngừ wĭt truh. Ayŏng Hồ Ngọc Hội sa čô mă kan brei thâo:

“Hruê 5 tết thŭn anei truh ti kdrŭn ksĭ. Hơ̆k mơak êdi, mâo mă lu kan ngừ. Tết hnui thŭn 2026 msĕ si mâo prăk mơ̆ng klei nao êa ksĭ leh.”

Ăt truh ti krŭn ksĭ kan Đông Tác leh dŭm hruê mơak yan mnga drông Tết, ayŏng Hồ Trọng Hạnh, pô kŭm păn mă kan ti ƀuôn hgŭm Phú yên, čar Dak Lak brei thâo:

“Gưl nao anei mâo mă lu, ayŏng adei hơ̆k mơak. Akŏ thŭn mâo klei găl sơnei jăk êdi leh.”

Êjai phung ma kan hdang truh ti kdrŭn ksĭ kan, phung hrui blei, knơ̆ng bruă ăt mâo ƀô̆ mta êjai kŭm păn mrâo truh. Cao Thành Hưng, bi ala sa knơ̆ng bruă hrui blei brei kan ngừ brei thâo, kan ti anôk trah mă Trường să mâo boh ktrŏn leh anăn hnơ̆ng jăk, mâo dŭm anôk mnia mblei dleh mnsĕ si Ơrôp, Mi, Japon khăp êdi. Jih jang kan truh hlăm dŭm hruê akŏ yan mnga mâo knơ̆ng bruă blei jih.

“Akŏ thŭn hmei gĭr blei mâo ênoh, đru kơ mnuih ƀuôn sang dŭm hruê dôk ti êa ksĭ, čiăng kơ grăp čô mâo sa tết hưi trei mđao.”

Klei tĭng mkă mơ̆ng anôk bruă kan hdang leh anăn êa ksĭ, plao ksĭ Dak Lak, leh Tết nguyên đán Bính Ngọ, grăp hruê mâo dŭm pluh kŭm păn mă kan (lu hĭn jing kan ngừ êa ksĭ) truh kơ kdrŭn kan, hŏng hnơ̆ng mĭn tĭng dŭm êtuh tôn.

Mơ̆ng đang kphê mtah truh kơ kŭm păn bŏ dlai kan hdang, klei mă bruă leh Tết ti Dak Lak dôk pŏk lu êa mil mngač.Ai êwa trŭn kơ bruă mjêč, klei mă bruă čŏng pô leh anăn klei bi mguôp plah wah phung mă kan hdang hŏng knơ̆ng bruă mkŏ mjing tur knơ̆ng kjăp kơ sa thŭn mrâo mâo lu klei hmăng hmưi. Hŏng klei đăo knang mrâo, klei gĭr mrâo leh anăn hdră ngă bruă tŭ dưn, ƀĭng ngă lŏ hma, phung mă kan hdang Dak Lak hmăng hmưi sa thŭn Bính Ngŏ tŭ jing, klei hdĭp mnuih ƀuôn sang đĭ kyar, đru hlăm klei đĭ kyar hơĭt kjăp mơ̆ng alŭ wăl.