Tlam 26/2, ti Anôk bruă knŭk kna, Khua knŭk kna Phạm Minh Chính drông Khua bi ala Belgium ti Việt Nam Karl Van Den Bossche bi trông kơ klei bi hgŭm Việt Nam - Belgium, boh nik hlăm bruă duh mkra - mnia blei - bi liê leh anăn đru msir klei jhat mơ̆ng klei ruă đioxin ngă ti Việt Nam. Bi mklă Việt Nam dlăng nanao kơ Belgium jing ƀĭng hgŭm yuôm bhăn hlăm EU, Khua knŭk kna mtă kơ dua tĭng lŏ dơ̆ng mđĭ klei kđi čar hlăm bruă mđĭ ktang klei bi trông êpul dŭm gưl, dŭm hdră; mđĭ klei tŭ dưn klei bhiăn bi hgŭm dua nah, bi hgŭm kjăp hlăm dŭm klei bi kƀĭn, êpul bruă lu ala čar.

Mbĭt anăn dua tĭng lŏ dơ̆ng mđĭ lar leh anăn mđĭ ktang klei bi hgŭm hlăm dŭm mta bruă msĕ si klei êđăp ênang ala čar, dhar kreh, sang hră leh anăn mtô bi hriăm, klei yan adiê ngă, hiu čhưn ênguê…leh anăn pŏk mlar klei bi hgŭm hlăm dŭm hdră bruă kơ klei kreh knhâo - kdrăp mrâo, chip bán dẫn, êlan klông dŭ mdiăng… Ƀri gưl anei, Khua knŭk kna lŏ mñă bi mni kơ Bruă kƀĭn ala nah gŭ Belgium bi mklă Hdră mtrŭn  đru kơ phung êa drao ruă đioxin ngă ti Việt Nam (mlan 10/2023), đru mđĭ klei đru kơ êpul êya lu ala čar kơ bruă anei.