Hlăm thŭn  2024, Binh Đoàn dưi mâo lu boh tŭ dưn êdah êdi. Anôk bruă hluê ngă hdră răng mgang mrâo mrao, rơ̆ng kjăp bruă klam mprăp klei kdơ̆ng mblah leh anăn hluê ngă tŭ dưn dŭm hdră êlan răng mgang klei êđăp ênang krĭng knông lăn mbĭt hŏng dŭm alŭ wăl hdră êlan. Êngao kơnăn, dŭm anôk bruă mơ̆ng Binh Đoàn lŏ mdưm 750 camera ti dŭm alŭ wăl kñăm, đru mguôp yuôm bhăn hlăm bruă răng mgang klei êđăp ênang knông lăn Việt Nam – Campuchia.

Nao hlăm mmông bi tuôm, Đại tá Phan Xuân Hòa – Khua dlăn bruă Đảng hđăp, k’iăng khua kiă kriê hđăp Knơ̆ng bruă 715 (hlăm Binh đoàn 15) bi êdah klei hơ̆k mơak ti anăp dŭm boh tŭ dưn dưi mâo mơ̆ng Binh đoàn. Binh đoàn amâo djŏ knĭng mkra mjing dŭm mta mnơ̆ng dhơ̆ng čiăng êdi, ƀiădah lŏ kah sa kdrêč čiăng rŭ mdơ̆ng bruă mkŏ mkra hlăm alŭ wăl, đru bi hơĭt klei hdĭp mnuih ƀuôn sang alŭ wăl. Hlăm wưng kơ anăp, Binh Đoàn srăng lŏ bi lar knhuah gru jhŏng ktang, mkŏ mjing anôk bruă ƀrư̆ hruê ƀrư̆ đĭ kyar.