Trung tá Vương Văn Khoa, Khua Anôk bruă kahan ksiêm să Dak Som, kdriêk Dak Glŏng, brei thâo, mơ̆ng klei đru yang ƀuôn, să dưi mkŏ dưm leh 11 boh camera răng mgang klei êđăp ênang ti dŭm krĭng phŭn, êlan găn êrô phŭn, kdrŭn mjưh mran hiu čhưn ênguê Tà Đùng. Kdrăp camera dưi mkŏ hŏng anôk bruă kahan ksiêm să, anôk bruă sang čư̆ êa să, phung mă bruă kahan ksiêm să lehanăn khua ƀuôn čiăng ksiêm dlăng bruă răng mgang klei êđăp ênang. Camera răng mgang klei êđăp ênang đru mguôp hlăm hdră gang mkhư̆ phung ngă soh, rơ̆ng klei êđăp ênang ti alŭ wăl. Mơ̆ng bruă ksiêm dlăng hlăm camera, êpul kahan ksiêm bi hgŭm duah ƀuh lehanăn atăt sa čô êkei mduôn 73 thŭn ti să Quảng Khê amâo jăk kŏ dlô wĭt kơ sang êđăp ênang. Mơ̆ng boh tŭ anei, kahan ksiêm să Dak Som lŏ dơ̆ng mđĭ lar gru hmô camera răng mgang klei êđăp ênang truh kơ dŭm krĭng ƀuôn sang.

Mơ̆ng leh kahan ksiêm să mkŏ dưm camera snăn klei mâo amâo jăk ti alŭ wăl hrŏ lu. Ăt mơ̆ng camera anei hmei hmao ƀuh leh sa čô êkei mduôn amâo jăk kŏ dlô đuê̆ hiu amâo lŏ thâo bĭt êlan mơ̆ng Quảng Khê.

Ăt msĕ ti să Dak Som, truh ară anei kahan ksiêm să Quảng Khê, kdriêk Dak Glŏng, mkŏ dưm leh 19 boh camera răng mgang klei êđăp ênang ti dŭm ktuê êlan phŭn, krĭng ƀuôn sang dôk. Thiếu tá Phạm Ngũ Lạng, Khua kahan ksiêm să Quảng Khê, brei thâo, să dôk iêu mtrŭt djăp ai dưi, klei mâo lŏ mkŏ dưm 13 boh camera, mkăp kơ klei čiăng kriê dlăng dŭm alŭ wăl ti kdriêk.

Mlan 10/2022 mơ̆ng klei đru yang ƀuôn, hmei mkŏ dưm leh camera răng mgang klei êđăp ênang, mơ̆ng anăn truh ară anei amâo mâo klei truh ôh, phung ngă luič klei êđăp ênang, phung êdam êra hlăp čhưn truh krah mlam ăt hrŏ mơh. Klei năng mđing, jing phung hđeh hriăm hră đĭ êdeh amâo đua đuôn gang kŏ, đĭ êdeh pral … amâo lŏ msĕ hŏng êlâo ôh.

Kdrăp camera răng mgang klei êđăp ênang mđĭ lar klei tŭ dưn amâo djŏ knŏng đru kơ êpul djŏ tuôm rơ̆ng klei êđăp ênang, ƀiădah lŏ bi mlih klei mưng, klei thâo săng mơ̆ng mnuih ƀuôn sang krĭng taih kbưi Dak Glŏng hlăm bruă hluê ngă hdră bhiăn, boh nik hlăm klei găn êrô. Boh tŭ klă sĭt hĭn jing rơ̆ng klei êđăp ênang alŭ wăl čiăng mnuih ƀuôn sang h’ĭt ai tiê mă bruă duh mkra pla mjing. Trần Đình Hưng, ti thôn 1, să Dak Som, kdriêk Dak Glŏng hơ̆k kdơ̆k lač:

Tinei, bruă răng mgang klei êđăp ênang jăk, sui sui kreh luič asâo đuič. Ƀiădah mơ̆ng leh mâo camera răng mgang klei êđăp ênang, kâo ƀuh kăn đei lŏ mâo mơh.

Hluê kahan ksiêm kdriêk Dak Glŏng, truh ară anei, gru hmô camera răng mgang klei êđăp ênang dưi pŏk ngă ti jih 7 să hlăm kdriêk, hŏng êbeh 100 anôk. Thượng tá Nguyễn Xuân Hùng, Khua anôk bruă kahan ksiêm kdriêk Dak Glŏng brei thâo, hŏng dŭm boh tŭ dưn klă sĭt, kahan ksiêm kdriêk dôk iêu mtrŭt klei đru mơ̆ng yang ƀuôn čiăng lŏ mkŏ dưm kdrăp camera.

Hmei ƀuh boh tŭ hlăm hdră gang mkhư̆ phung ngă soh ăt msĕ mơh hdră mkŏ mkra gru hmô, hdră jih jang mnuih ƀuôn snag hgŭm răng mgang klei êđăp ênang ala čar. Khădah jing kdriêk ƀun ƀiădah hŏng klei gĭr, kahan ksiêm kdriêk gĭt gai leh anôk bruă kahan ksiêm să bi hgŭm hŏng bruă sang čư̆ êa alŭ wăl iêu mtrŭt klei đru mơ̆ng yang ƀuôn čiăng mkra gru hmô camera răng mgang klei êđăp ênang kluôm kdriêk.

Ti krĭng taih kbưi Dak Glŏng, alŭ wăl prŏng, mnuih ƀuôn sang dôk raih rưng, gru hmô camera răng mgang klei êđăp ênang dưi dlăng jing “Ală mta” êpul kahan ksiêm hlăk lehanăn dôk mđĭ lar klei tŭ hlăm hdră gang mkhư̆ phung ngă soh, rơ̆ng klei êđăp ênang… Mbĭt anăn, gru hmô anei ăt dưi mđĭ lar ai ktang mơ̆ng jih jang mnuih ƀuôn sang hlăm hdră răng mgang klei êđăp ênang ala čar./.