Hlăm 2 hruê mơ̆ng hruê 1-2/12, Bruă Đảng čar Dak Lak mkŏ mjing klei kƀĭn Êpul khua bruă Đảng čar tal 16 (pŏk phai) brei klei blŭ kơ dŭm mta phŭn hluê ngă bruă klam thŭn 2022, hdră tă, bruă klam thŭn 2023, bruă ksiêm dlăng, bi klă leh anăn ngă klei ƀuah mkra hlăm Đảng, hdră čuăl mkă čar Dak Lak wưng thŭn 2021 – 2030, tă hdră truh ti thŭn 2050 leh anăn mkra mlih, bi mbŏ hdră ngă bruă mơ̆ng Êpul khua bruă Đảng gưl 17, wưng thŭn 2020 – 2025.

Blŭ hlăm klei kƀĭn, Nguyễn Đình Trung, Khua hlăm bruă Đảng gưl dlông, Khua bruă Đảng čar Dak Lak mñă klă, dŭm gưl bruă Đảng, alŭ wăl lŏ ksiêm wĭt dŭm klei êdu kƀah čiăng duah hdră mgaih msir. Mbĭt anăn čŏng nao mbĭt hŏng bruă klam čiăng hluê ngă dŭm hdră mtrŭn mâo leh. Hlăm anăn, kñăm hluê ngă hdră mtrŭn mrô 23 mơ̆ng Phŭn bruă kđi čar kơ hdră êlan mđĭ kyar bruă duh mkra ala ƀuôn krĭng Lăn Dăp Kngư, hdră mtrŭn lông yua kơ bruă mkŏ mjing hdră hjăn kơ ƀuôn prŏng Ƀuôn Ama Thuôt, hluê ngă dŭm hdră kñăm hlăm čar, hluê ngă hdră knŭk kna mrô, ƀuôn prŏng thâo mĭn, mgaih msir boh klei mdei êjai klei brei čan duh bi liê bruă knŭk kna.