Hluê si aduôn Nguyễn Thụy Phương Hiếu, k’iăng khua kiă kriê knơ̆ng bruă dhar kreh – mjuăt ktang asei mlei leh anăn hiu čhưn ênguê čar Dak Lak, anei jing sa mta bruă dhar kreh hŏng tač êngao mơ̆ng čar Dak Lak hlăm thŭn 2022. Gưl nao ngă bruă ƀri wưng bi hdơr 60 thŭn hruê mkŏ mjing klei jĕ giăm Việt Nam – Lào, 45 thŭn bi hgŭm Việt Nam – Lào leh anăn dưi mkŏ mjing djŏ wưng bi hdơr 47 thŭn hruê mkŏ mjing ala čar Lào 2/12.

Hlăm gưl nao ngă bruă, 2 tĭng mâo leh klei blŭ hrăm, bi trông kơ klei bi mguôp mđĭ kyar dhar kreh leh anăn hiu čhưn ênguê. Bi tŭ ư bi klă hră bi hdơr plah wah 2 knơ̆ng bruă mơ̆ng 2 čar kơ klei bi mguôp. Bi đru hdơ̆ng pô hlăm bruă bi mguôp mđĭ kyar dhar kreh leh anăn hiu čhưn ênguê wưng mơ̆ng ară anei truh ti thŭn 2025. Hluê si mta phŭn bi klă, 2 tĭng srăng bi mlih tuôr ngă bruă dhar kreh hŏng tač êngao, ba êpul rang mdah gưl čar nao kơ čar găp čiăng rang mdah leh anăn ksiêm dlăng mkŏ bruă hiu čhưn ênguê plah wah knơ̆ng bruă hŏng dŭm anôk hiu chưn ênguê ti grăp čar. Mbĭt anăn, ba knhuah dhar kreh jăk siam grăp čar nao kơ čar găp čiăng mjĕ êrô, hưn mdah.

Aduôn Nguyễn Thụy Phương Hiếu lač, jih 2 čar dôk hlăm 3 kiêng đĭ kyar bruă hiu čhưn ênguê Lào – Việt Nam – Campuchia mâo leh 3 knŭk kna bi klă. Dak Lak ăt mâo leh hdră kơ 3 kiêng bruă hiu čhưn ênguê leh anăn srăng hnưm hluê ngă hlăm wưng kơ anăp.

Ăt hlăm hdră, êpul ngă bruă mơ̆ng čar Dak Lak mâo leh klei nao čuă, hơêč hmưi kơ khua gĭt gai čar Sê Kông leh anăn nao hlăm knăm bi hdơr hruê mkŏ mjing ala čar Lào ti čar Sê Kông. Čar Dak Lak ăt bi mguôp mkŏ mjing klei rang mdah leh anăn mâo mă klei uêñ mĭn, ktuê dlăng leh anăn sa ai mơ̆ng čar Sê Kông. Aduôn Nguyễn Thụy Phương Hiếu lač: Nao ngă bruă djŏ wưng bi hdơr 47 thŭn hruê mkŏ mjing ala čar ti ala čar Lào, kyuanăn lŏ bi kjăp leh anăn bi êlam hĭn klei khăp. Hlăm gưl nao ngă bruă, êpul ăt mâo khua gĭt gai čar, khua gĭt gai knơ̆ng bruă ăt msĕ hŏng dŭm, knơ̆ng, dhar bruă mkŏ mjing klei găl, djăp dŏ leh anăn klei khăp mđao brei kơ êpul hlăm dŭm hruê dôk ti čar Sê Kông dưi bi leh jăk bruă klam pô leh anăn thâo săng klă hĭt kơ dhar kreh, ngăn dŏ, klei siam čar Sê Kông, leh anăn mđĭ hĭn klei bi mguôp plah wah 2 čar ăt msĕ hŏng 2 ala čar.