Bruă mtô bi hriăm čar Dak Nông thŭn hriăm anei kƀah 1.545 čô, bi bruă mdrao mgŭn čar ară anei dôk kƀah 664 čô. Ênoh mnuih dôk kƀah anei hlăm lu thŭn êgao leh anăn ƀrư̆ đĭ. Wăt tơdah čar ba yua leh Hdră mtrŭn 111 thŭn 2022 mơ̆ng Knŭk kna čiăng kơ klei kuôl kă 643 čô mnuih mă bruă ƀiădah ka dưi ngă djŏ klei čiăng kơ bruă mtô bi hriăm leh anăn mdrao mgŭn, boh nik hŏng krĭng taih kbưi, krĭng mnuih djuê ƀiă.

Lê Văn Chiến, Kơiăng Khua Knơ̆ng bruă sang čư̆ êa čar Dak Nông brei thâo, mâo lu bruă kƀah hlăm klei jao mnuih mă bruă sang hră mtô bi hriăm leh anăn mdrao mgŭn hŏng dŭm čar krĭng čư̆ čhiăng, ênoh mnuih ƀuôn sang đĭ pral leh anăn mnuih ƀuôn sang hdĭp rah rưng lu anôk msĕ si alŭ wăl. Ênoh phung mă bruă sĭt dưi jao ƀiă hĭn mkă hŏng ênoh brei bi hrŏ mnuih mă bruă grăp thŭn, ngă kơ 2 dhar bruă yuôm bhăn anei hlăk kƀah leh snăn ƀrư̆ kƀah kjham hĭn.