Hlăm klei nao čhưn lehanăn mă bruă ti čar Hà Tĩnh, tlam mbrue 27.12, Khua bruă kƀĭn ala Trần Thanh Mẫn mă leh bruă hŏng êpul khua kiă kriê bruă Đảng čar Hà Tĩnh kơ boh tŭ dưn hlue ngă hdră mtrŭn klei bi kƀĭn prŏng Đảng kluôm ala gưl 13, hdră mtrŭn klei bi kƀĭn prŏng Đảng čar tal 19, wưng păn bruă 2020 – 2025 lehanăn hlue ngă hdră mtrŭn mơ̆ng anôk bruă kƀĭn ala, hŏng bruă dăp wĭt êpul êya ngă bruă dŭm gưl kdriêk, să hlăm čar wưng thŭn 2023 - 2025. 

Leh hmư̆ klei phung khua kiă kriê čar Hà Tĩnh hâo mdah, snăn phung bi ala hlăm êpul ngă bruă bi mni kơ hnơ̆ng đĭ kyar (GRDP) mơ̆ng čar Hà Tĩnh truh 7,48%, mâo ba wĭt truh 9.600 êklai prăk hlăm ênoh jih jang ngăn prăk ba wĭt kơ knŭk kna hlăm thŭn jing giăm 18 êbâo êklai prăk, Hà Tĩnh jing leh klei ba akŏ hlăm bruă mkŏ mkra krĭng ƀuôn sang mrâo. Phung bi ala hlăm êpul čang hmăng kơ čar Hà Tĩnh lŏ dơ̆ng ruh mgaih jih klei dleh dlan, mâo klei đĭ kyar pral ktưn bi mâo ênoh hlăm dua mrô. Khua bruă kƀĭn ala Trần Thanh Mẫn  lač, hŏng dŭm klei găl mơ̆ng  Hà Tĩnh tơdah dưi dưn yua jih, boh tŭ dưn srăng đĭ lu hĭn. Ƀri thŭn mrâo Ất Tỵ, hlăm tlam mbrue, ti kdriêk Thạch Hà, čar Hà Tĩnh, Khua bruă kƀĭn ala Trần Thanh Mẫn nao čuă, mđup brei mnơ̆ng kơ dŭm gŏ sang knŭk kna dlăng ba, gŏ sang dôk hlăm klei dleh dlan ti dŭm kdriêk Hương Sơn, Thạch Hà lehanăn ɃP. Hà Tĩnh.