Ênhă ƀuôn prŏng Đà Lạt ăt dưi pŏk phai truh 9 blư̆ mkă hŏng ară anei. Klei kƀĭn tal 19 Êpul gơ̆ng bruă ƀuôn sang čar Lâm Đồng gưl 10 mkŏ mjing hruê mbruê 4/10 bi klă leh hdră êlan čuăl mkă kluôm ƀuôn prŏng Đà Lạt leh anăn dŭm krĭng jĕ giăm truh kơ thŭn 2045. Klei mkra mlih anei bi mâo djăp klei čiăng ară anei leh anăn êdei anăp mơ̆ng ƀuôn prŏng, ăt msĕ mơh mgaih msir dŭm klei êdeh kƀah, klei dleh dlan hlăm êlan klông, wăl krah dôk mâo klei rai, boh nik ti krĭng knơ̆ng mơ̆ng Đà Lạt.

Hluê si hdră êlan mkra mlih, hnơ̆ng čuăl mkă mâo kluôm ƀuôn prŏng Đà Lạt  leh anăn dŭm kdriêk Lạc Dương, Đơn Dương, Đức Trọng hŏng sa kdrêč kdriêk Lâm Hà mâo boh dlông 850m mkă hŏng êlah êa ksĭ, hŏng ênhă jih jang truh 336.000ha. Hlăm anăn, krĭng lŏ hmăi mâo thiăm kdriêk Dam Rông. Hdră mkra mlih kluôm anei bi klă dŭm hdră êlan, hdră tă mđĭ kyar bruă čuăl mkă mkŏ mjing krĭng mơ̆ng čar Lâm Đồng, bi mâo djăp klei čiăng kriê dlăng leh anăn mđĭ kyar bruă duh mkra ala ƀuôn, dhar bruă, wăl krah- wăl siam ti alŭ wăl ƀuôn prŏng leh anăn krĭng jĕ giăm. Mbĭt anăn, ba yua tŭ dưn dŭm klei găl mâo, wăl mnơ̆ng hdĭp phŭn mơ̆ng ƀuôn prŏng Đà Lạt čiăng mđĭ kyar ƀuôn prŏng mrâo mrang, knhuah gru, mâo ai iêo jak, ƀrư̆ ƀrư̆ mđĭ hnơ̆ng tŭ jăk ƀuôn prŏng.