Leh 2 mkŏ mjing klei phŭn ba yua kdrêč “Việt Nam –Ênuk gưl kpưn đĭ”, aguah mbrue 4/10, ti Hà Nội, Khua knơ̆ng kiă kriê sang mđung asăp blŭ  Việt Nam Đỗ Tiến Sỹ nao ksiêm dlăng leh bruă mkŏ mjing kdrêč mă bruă anei mơ̆ng sang mđung asăp blŭ mâo: Êpul bruă klei mrâo (VOV1), Êpul bruă hŏng ala tač êngao (VOV5), Bruă klei mrâo elektronik VOV.vn, Anôk mđung rup mrô VTC, anôk mđung rup VOVTV, anôk mđung hdră êđăp ênang êlan klông VOV lehanăn hră klei mrâo Báo Tiếng nói Việt Nam.

Ti anôk ksiêm, Khua knơ̆ng kiă kriê sang mđung asăp blŭ Việt Nam- Đỗ Tiến Sỹ lač: Jih jang bruă anei mâo ngă jing kñăm bi êdah ai tiê klei bi hdơr 55 thŭn hlue ngă klei khua gĭt gai Hồ Chí Minh, anăp truh kơ klei bi kƀĭn prŏng Đảng kluôm ala gưl 14, anăp bi hdơr 40 thŭn mâo klei mlih mrâo lăn čar kruak kơ sa gưl ênuk kpưn đĭ mơ̆ng djuê. Bruă sang mđung asăp blŭ Việt Nam pral mkŏ mjing kdrêč anei jing hdră êlan bi lar klei mrâo hŏng djăp hdră, lu mta kơ kdrêč “Việt Nam – Ênuk gưl kpưn đĭ”, bi êdah klei gĭr mơ̆ng sang mđung asăp blŭ mđrăm mbĭt hlăm hdră êlan mđĭ kyar mơ̆ng Đảng lehanăn knŭk kna.