Hlue si klei hưn mdah hlăm klei bi kƀĭn, thŭn 2022, boh klei bruă duh mkra- ala ƀuôn čar Dak Lak mâo leh klei bi mlih jăk. Lu dŭm hnơ̆ng kčah hlue si Hdră mtrŭn hlue ngă mâo klei tŭ dưn. Ênoh mnơ̆ng dhơ̆ng đăo tĭng mâo êbeh 58 êbâo 3 êtuh êklai prăk, đĭ 8,9% mkă hŏng thŭn 2021. Lu dhar bruă dôk gĭr ktưn leh anăn dưi lŏ mâo hnơ̆ng đĭ kyar, msĕ si bruă lŏ hma, rông kan hdang, ba čhĭ mnơ̆ng dhơ̆ng kơ ala tač êngao, iêô jak phung tuê hiu čhưn… mâo hnơ̆ng đĭ kyar lu mkă hŏng wưng anei thŭn dih. 

Bruă mtô bi hriăm, dhar kreh, ala ƀuôn, mdrao mgŭn, klei hdĭp mda ala ƀuôn lŏ dơ̆ng dưi mđing dlăng, gĭt gai hlue ngă jăk, klei êđăp ênang ala ƀuôn dưi krơ̆ng kjăp. Čar Dak Lak ăt adôk mâo klei kƀah kơ hnơ̆ng luôm dliê knŏng mâo êbeh 38%. Hnơ̆ng brei čan prăk knŭk kna ƀiă knŏng mâo 29,5% hdră kčah; boh klei kƀah êa drao, kdrăp mnơ̆ng mdrao mgŭn ti sang êa drao knŭk kna êmưt dưi msir mgaih ngă kơ mnuih ƀuôn sang amâo ư ai./.