Bi klă bruă hluê ngă bruă klam thŭn 2022, Phung bi ala lač, Bruă duh mkra ala ƀuôn kluôm čar Dak Lak thŭn anei ăt mâo lu klei mngač. Ƀiădah klei brei čan duh bi liê bruă knŭk kna dôk ƀiă êdi, knŏng mâo mă 29,5%, mbĭt hŏng anăn jing bruă mkra mlih, bi mbŏ lu blư̆, hnơ̆ng tŭ jăk dŭm bruă mkŏ mkra ka djăp ôh, hmăi truh kơ klei đăo knang mnuih ƀuôn sang ăt msĕ hŏng klei krŭ wĭt bruă duh mkra wưng êdei klei ruă tưp Covid-19.

Bi hŏng bruă lŏ hma, Phung bi ala Êpul gơ̆ng bruă ƀuôn sang čar Dak Lak mñă čiăng mâo lu hdră êlan klă klơ̆ng kñăm đru kơ mnuih ƀuôn sang mđĭ kyar bruă lŏ hma hŏng kdrăp mrâo mrang, mkŏ mjing klei bi mguôp klă anăp mơ̆ng knơ̆ng bruă hŏng ƀĭng ngă lŏ hma. Êngao kơnăn, čiăng mâo hdră čuăl mkă, mkŏ mjing mrô krĭng pla mjing kơ ana ƀơ̆ng boh, kñăm ñĕ kơ klei pla êgao hnơ̆ng, klei mkăp lu hĭn kơ klei čiăng. Êngao kơnăn, phung bi ala ăt bi êdah dŭm boh klei hlơr ti čar Dak Lak msĕ si: mgaih msir bruă mă kơ mnuih mă bruă, mkŏ mjing hdră êlan, klei đru kơ phung knuă druh nah gŭ, mđĭ hnư hrui wĭt, bi hơĭt klei hdĭp phung nai mtô, čiăng mâo klei hơĭt mă bruă knuă.