Mơ̆ng krah mlan 11 thŭn anei, Anôk gĭt gai hdră tui duah, hrui mƀĭn klang kleh lehanăn bi mklă phung kahan djiê êngiă (Anôk gĭt gai 515) čar Dak Lak pŏk leh knăm trŭn kơ bruă mơ̆ng Êpul K51 nao truh ti čar Mondulkiri (Campuchia) ngă bruă klam tui duah, hrui mƀĭn klah kleh phung kahan ba anăp, phung thơ̆ng kơ bruă mơ̆ng Việt Nam djiê êngiă hlăm ênuk bi blah ti Campuchia hlăm yan bhang thŭn 2022-2023. Ti Campuchia, Anôk gĭt gai 515 čar Dak Lak nao bi tuôm, mtô mblang, mtrŭt mjhar bruă sang čư̆ êa, mnuih ƀuôn sang ti ala čar Campuchia mjing klei găl đru kơ knuă druh, lĭng kahan Êpul K51 ngă bruă. Mbĭt anăn, mâo hdră đru kơ mnuih ƀuôn sang, hưn mthâo hdră đru jăk găl mơ̆ng knŭk kna Việt Nam hŏng hlei pô mkăp djŏ klă klei hâo hưn kơ msat phung kahan djiê êngiă Việt Nam. Hlăm hdră mă bruă, phung knuă druh Êpul kahan K51 ăt hluê ngă kjăp hdră bhiăn ti ala čar Campuchia, mpŭ kơ knhuah dhar kreh, klei bhiăn ti alŭ wăl.

Aduôn H Yim Kđoh, K’iăng khua anôk bruă sang čư̆ êa čar, Khua anôk bruă 515 čar Dak Lak brei thâo, khădah tuôm hŏng lu klei dleh dlan, ƀiădah hdră tui duah, hrui mƀĭn klang phung kahan djiê êngiă ti ala čar Campuchia mâo leh klei mđing dlăng lehanăn đru mơ̆ng Êpul thơ̆ng kơ bruă čar Mondulkiri ăt msĕ mơh bruă sang čư̆ êa lehanăn mnuih ƀuôn sang ala čar ƀĭng găp. Hlăm hdră ngă bruă klam, Anôk gĭt gai mơ̆ng čar Dak Lak tui ksiêm nanao, mđĭ ai čiăng ayŏng adei bi leh jih bruă klam. Hlăm anăn, mâo klei bi hgŭm kjăp hŏng dua Anôk thơ̆ng kơ bruă mơ̆ng Dak Lak lehanăn Mondulkiri. Boh nik, mtrŭt mđĭ hdră mtô mblang truh kơ mnuih ƀuôn sang dŭm djuê ana ti Mondulkiri kñăm mjing klei găl hluê ngă bruă klam.

Hdră tui duah, hrui mƀĭn lehanăn ba wĭt kơ lăn čar klang kleh phung kahan ba anăp lehanăn phung thơ̆ng kơ bruă Việt Nam djiê êngiă hlăm ênuk bi blah ti Campuchia mâo čar Dak Lak hluê ngă ti čar Mondulkiri mơ̆ng thŭn 2001. Truh ară anei, mâo hrui mƀĭn giăm 700 klang leh djiê êngiă wĭt kơ ƀuôn sang./.