Khua knŭk kna Phạm Minh Chính mtă kơ dua ala čar lŏ dơ̆ng mđing pŏk mlar, mđĭ klei bi hgŭm dŭm wăl tuh tia mkra mjing Việt Nam – Singapore (VSIP) hlue si gru hmô ênuk mrâo, bi mguôp tuh tia mkra mjing hŏng hdră bruă, kdrăp mrâo leh anăn wăl anôk duh mkra; gĭr tưn mâo 30 VSIP hlăm thŭn 2026.

Dua tĭng bi tŭ ư mđĭ ktang klei bi hgŭm bruă lĭng kahan - klei êđăp ênang, gang mkhư̆ phung ngă soh hluh knông lăn, rơ̆ng wăl hdĭp mda êđăp ênang, hơĭt kjăp kơ klei đĭ kyar; mđĭ klei bi hgŭm mtô bi hriăm, mđĭ kyar mnuih mă bruă, boh nik êpul khua gĭt gai gưl dlông phŭn; pŏk mlar hnư prăk hriăm hră kơ Việt Nam leh anăn mđĭ klei mjĕ êrô mnuih ƀuôn sang. Khua knŭk kna Singapore Lawrence Wong hơêč hmưi klei tŭ jing Klei bi kƀĭn tal XIV mơ̆ng Đảng Cộng sản Việt Nam, bi mklă klei đăo knang hlăm klei găl, klei čang hmăng mđĭ kyar mơ̆ng Việt Nam leh anăn ƀuăn rơ̆ng lŏ dơ̆ng pŏk mlar klei bi liê.