Nao hlăm hdră “Yan mnga lĭng kahan” 2026 ti Quảng Trực, Đại tướng Nguyễn Trọng Nghĩa, Khua hlăm Phŭn bruă kđi čar, Khua Anôk bruă kđi čar Lĭng kahan yang ƀuôn Việt Nam, mơĭt klei êmuh hrăm, mđĭ ai phung lĭng kahan - mnuih ƀuôn sang krĭng knông lăn čar Lâm Đồng; mbĭt anăn čih yap, bi mni kơ boh tŭ rơ̆ng êđăp ênang lĭng kahan, klei êđăp ênang leh anăn bruă êđăp ênang ala ƀuôn mơ̆ng Êpul kahan 7,  boh nik krĭng taih kbưi, krĭng knông lăn.

 “Kâo mơak snăk Êpul kahan 7 leh anăn Knơ̆ng bruă sang čư̆ êa čar Lâm Đồng mâo leh hdră klă sĭt, yuôm bhăn đru kơ mnuih ƀuôn sang ti krĭng knông lăn čar.  Kâo čang hmăng, bruă Đảng, bruă sang čư̆ êa, lĭng kahan leh anăn mnuih ƀuôn sang čar Lâm Đồng lŏ dơ̆ng čuê, mđĭ lar ai tiê 3 čar Dak Nông, Lâm Đồng leh anăn Bình Thuận čiăng mđĭ kyar hĭn, rơ̆ng bruă klam lĭng kahan, klei êđăp ênang, mnuih ƀuôn sang gĭr ngă bruă mkra mjing, gĭr ktưn tlaih ƀun leh anăn kpưn đĭ kơ mdrŏng.”

 Hlăm jar hdră “yan mnga lĭng kahan”, êpul kahan 7 mdơ̆ng Anôk mnuih ƀuôn sang dôk giăm kđông kahan răng mnông lăn, hŏng hnơ̆ng 60 boh sang bi lir. Grăp boh sang prŏng 90m2, mâo hdră bruă kjăp, tač ƀhu, anôk tŭk knă hŏng adŭ bruă djŏ tuôm. Jing sa hlăm dŭm gŏ êsei mâo ruah nao mă sang, ayŏng Điểu Cường, djuê ana M’Nông ti ƀon Bu Nung, să Quảng Trực, bi êdah:

“Leh thâo gŏ sang kâo mâo hlăm anăn mđup brei sang tal anei, hmei mơak snăk. Boh sang mkŏ mjing prŏng soam, kjăp srăng đru kơ jih gŏ sang hdĭp mda. Mni lač jăk lu snăk kơ Êpul kahan 7 leh anăn dŭm gưl, dhar bruă. Gŏ sang kâo srăng gĭr ngă bruă, hdĭp mda, bi hgŭm hŏng Êpul kahan răng mgang kjăp klei dưi êđăp ênang knông lăn leh anăn ƀuôn sang Quảng Trực.”

Să Quảng Trực mâo ênhă hlăm brô 559 km², prŏng tal dua kluôm ala, hŏng hlăm brô 40 km êlan knông lăn bi knông hŏng čar Mundulkiri (Campuchia).  Să mâo giăm mkrah wah ênoh mnuih ƀuôn sang jing mnuih djuê ƀiă. Trung tướng Lê Xuân Thế,  Khua Êpul kahan 7, brei thâo, bruă mkŏ mjing dŭm anôk bi knông hŏng kđông kahan - mnuih ƀuôn sang jing yuôm bhăn  kơ bruă rơ̆ng klei dưi êđăp ênang knông lăn:

 “Mâo klei tŭ ư mơ̆ng gưl bruă Đảng, bruă sang čư̆ êa dŭm alŭ wăl, Anôk bruă kahan pŏk ngă leh hdră mă dŭm anôk mnuih ƀuôn sang ngă phŭn, grăp knhuang mđĭ kyar mnuih ƀuôn sang ktuê knông lăn. Mơ̆ng anăn, kahan knang kơ mnuih ƀuôn sang čiăng răng mgang knông lăn; mnuih ƀuôn sang knang kơ kahan čiăng mă bruă, mkra mjing, mđĭ kyar bruă duh mkra, hơĭt kjăp klei hdĭp mda, đru răng mgang kjăp klei dưi lăn ala, klei êđăp ênang knông lăn ala čar mơ̆ng hnưm, mơ̆ng kbưi, mkŏ mjing klei hơĭt kjăp hlăm ƀuôn sang ti knông lăn.”