Ti ƀuôn hgŭm Sa Loong, čar Quảng Ngãi mtluk mtluk ai êwa drông thŭn blang mrâo – yan mnga kahan răng mgang knông lăn h’uh mđao ai tiê lĭng kahan lehanăn mnuih ƀuôn sang. Hdră anei mơ̆ng Knơ̆ng bruă kiă kriê kahan răng mgang knông lăn čar Quảng Ngãi bi hgŭm hŏng knơ̆ng bruă sang čư̆ êa ƀuôn hgŭm Sa Loong mkŏ mjing, jiă knhuah gru klei khăp lĭng kahan lehanăn mnuih ƀuôn sang ti knông lăn. Kahan răng mgang knông lăn čar Quảng Ngãi tiŏ nao leh phung nai aê mdrao kjăp hlăm bruă nao mkă dlăng kčĕ đru kơ klkei suaih pral, lehanăn mbha êa drao amâo mâo mă prăk ôh kơ mnuih ƀuôn sang.

Lường Thị Lá, dôk ti alŭ Hào Phú, ƀuôn hgŭm Sa Loong, brei thâo:

“Kâo mâo klei ruă hnơ̆ng êrah đĭ, ruă hlăm atŭt klang, bi krăn jơ̆ng kngan. Kâo hriê kơ anei čiăng mkă dlăng klei ruă, snăn mâo nai êa drao kahan mkă dlăng brei, mbha êa drao. Jih jang klei ruă kâo hưn mthâo hŏng nai aê mdrao, snăn diñu mă êa drao kơ kâo mnăm. Ƀri yan Tết jing klei mơak, mâo kahan răng mgang knông lăn, jing mơ̆ng gưl dlông đru snăn hmei mâo klei lač jăk lu êdi.”

Ai êwa Tết hriê dôk mtluk mtlak hlăm djăp mta klei bi đŭng điŏ, nao sang mnia amâo mâo liê prăk. Phung kahan răng mgang knông lăn, mbĭt hŏgn mnuih ƀuôn sang bi đŭng điŏ, bi mđup brei mnơ̆ng, ba hriê kơ mnuih ƀuôn sang sa yan   Tết h’uh mđao.

Hlăm hdră “Yan mnga kahan răng mgang knông lăn h’uh mđao ai tiê mnuih ƀuôn sang” thŭn 2026, knơ̆ng kiă kriê kahan răng mgang knông lăn čar  Quảng Ngãi mbĭt hŏng dŭm êpul êya mdrăm mbĭt mđup brei truh 450 hnư mnơ̆ng, hŏgn ênoh giăm 300 êklăk prăk mđup kơ dŭm gŏ sang knŭk kna dlăng ba, gŏ sang ƀun lehanăn phung hđeh dôk hlăm klei dleh dlan. Kđông răng mgang knông lăn Sa Loong đru leh sa gŏ sang ƀun sa drei êmô ana mđai mjing klei duah ƀơ̆ng kơ gŏ sang dleh dlan. Đại tá Trương Thiên An, Khua bruă Đảng anôk bruă kđi čar kđông kahan răng mgang knông lăn čar Quảng Ngãi brei thâo:

Hŏng dŭm hdră, kahan răng mgang knông lăn čar Quảng Ngãi ngă leh klei iêo mkrum đru ba mnơ̆ng Tết pioh đru kơ hlăm brô 2.000 gŏ sang dôk hlăm klei dleh dlan, gŏ sang ƀubn, lehanăn gŏ sang knŭk kna dlăng ba hlăm alŭ wăl, đru kơ klei duh ƀơ̆ng kơ êbeh 10 gŏ sang ƀun. Phung hđeh dôk hlăm hdră đru adei nao sang hră, mâo đru leh mnơ̆ng dhơ̆ng, prăk kơ phung hđeh pioh blei čhum ao, hdruôm hră hriăm.”./.