Tlam mbruê 10/2, ti Hà Nội, ƀri wưng mprăp drông yan mnga Bính Ngọ 2026,  Khua gĭt gai Đảng Tô Lâm, Khua knơ̆ng gĭt gai lĭng kahan gưl dlông nao hgŭm leh anăn gĭt gai mmông bi tuôm hŏng phung khua kahan, lĭng kahan gưl dlông leh wĭt mdei bruă. Hlăm mmông bi tuôm, Khua gĭt gai Đảng Tô Lâm mơĭt klei hơêč hmưi thŭn mrâo, hơêč hmưi klei suaih pral truh hŏng phung bi ala, mbĭt anăn hưn klah čŭn kơ boh sĭt tar rŏng lăn, hlăm alŭ wăl, dŭm gru kruăk êdah êdi wưng klei kƀĭn prŏng 13, boh tŭ dưn klei kƀĭn prŏng 14 leh anăn dŭm mta mrâo hlăm klei mĭn, hdră tă mđĭ kyar lăn čar hlăm wưng kơ anăp. Khua gĭt gai Đảng Tô Lâm mñă ktang klei čuăn lŏ dơ̆ng mkŏ mjing lĭng kahan yang ƀuôn cách mạng, thơ̆ng kơ bruă, knhăk, mrâo mrang hlăm ênuk kpưn đĭ mơ̆ng djuê ana, bi mâo djăp klei čuăn răng mgang lăn čar hlăm boh sĭt mrâo.

Khua gĭt gai Đảng Tô Lâm bi êdah klei đăo knang hŏng knhuah hdĭp kđi čar kjăp, klei hriăm hlăm boh sĭt, phung khua kahan, lĭng kahan gưl dlông leh mdei bruă lŏ đru mguôp lu hĭn kơ bruă mkŏ mjing, ƀuah mkra hlăm Đảng, mkŏ mjing êpul lĭng kahan yang ƀuôn kpă ênô, kjăp ktang, siă suôr hŏng Đảng, Knŭk kna leh anăn mnuih ƀuôn sang.