Hruê 12/10/2007, Êpul hgŭm bruă Knơ̆ng bruă mniê čar Dak Lak dưi mkŏ mjing. Grăp thŭn, phung amai adei hlăm êpul đru mguôp leh dŭm êtuh êklăk prăk kơ dŭm hdră msĕ si: Sang klei khăp, amĭ rông phung hđeh êrĭt êrin, đru kơ phung mniê ƀun ƀin, gŏ sang dleh dlan mđĭ kyar bruă duh mkra, gang mkhư̆ klei ruă tưp Covid-19.

Leh êbeh 15 thŭn ngă bruă, Bruă sang čư êa čar Dak Lak bi klă brei mkŏ mjing Êpul hgŭm phung mnia mblei mniê čar Dak Lak. Mta kñăm mơ̆ng êpul jing bi kƀĭn phung mniê mnia mblei hlăm djăp Mta bruă hlăm bruă duh mkra ala ƀuôn, đru mđĭ kyar knơ̆ng bruă, bi mkŏ phung mnia mblei ti alŭ wăl čar Dak Lak leh anăn mtrŭt mđĭ klei bi mguôp, kah mnar klei hriăm kriê dlăng, bi đru hdơ̆ng pô mđĭ kyar mdrŏng sah, mtăp mđơr.