Hluê si Y- Linh Niê, k’iăng khua bruă mặt trận să Čư̆ Prao, ƀuôn Pa, Ƀuôn Năng leh anăn ƀuôn Hoang mâo 346 gŏ sang hŏng 1.440 čô mnuih, hlăm anăn mnuih djuê ana Êđê mâo êbeh 90%. Grăp thŭn, hlăm hruê knăm bi mguôp jih jang djuê ana, bruă sang čư êa să mkŏ mjing bruă tŭ drông hlăm grăp boh ƀuôn, ƀiădah thŭn anei, bruă sang čư êa să bi klă mkŏ mjing mbĭt čiăng bi râo ai tiê bi mguôp mơ̆ng dŭm djuê ana hlăm alŭ wăl.

Nao hlăm hruê knăm bi mguôp jih jang djuê ana ti să Čư̆ Prao, kdriêk M’Drak, Y - Ƀiêr Niê, k’iăng khua hlăm bruă Đảng čar Dak Lak brei thâo, bruă anei jing leh hruê knăm prŏng mơ̆ng êpul êya yang ƀuôn hŏng lu mta bruă ngă, boh hŏng knhuah dhar kreh jăk siam mơ̆ng dŭm djuê ana Việt Nam, đru mđĭ hĭn klei bi mguôp jih jang djuê ana.