VOV4.Êđê - Aguah 18/10, ti ƀuôn prŏng Ƀuôn Ama Thuôt, Knơ̆ng bruă sang čư̆ êa čar Dak Lak mkŏ mjing knăm mphŭn čô̆ kơ bruă mlih mrâo mbruă gưl čar thŭn 2022 hŏng lu bruă ngă kñăm mđĭ hdră mphŭn čô̆ kơ bruă mlih mrâo mbruă ti alŭ wăl đĭ kyar. Nguyễn Tuấn Hà, K’iăng Khua Knơ̆ng bruă sang čư̆ êa čar Dak Lak, khua anôk bruă gĭt gai Knăm mơak brei thâo, anei jing klei mâo grăp thŭn kơ êpul êya mphŭn čô̆ kơ bruă ti čar.

Leh giăm 3 thŭn hmăi kyua klei ruă tưp, knăm mơak jing bruă ngă kñăm mđĭ klei mlih mrâo mbruă leh anăn mphŭn čô̆ kơ bruă mguôp hŏng klei găl ti alŭ wăl; mkŏ, iêô jak klei găl čiăng mđĭ kyar hdră mphŭn čô̆ kơ bruă mlih mrâo mơ̆ng čar, grăp knhuang hlue ngă klei čang hmăng jing anôk phŭn kơ phung leh anăn anôk bruă duh mkra mphŭn čô̆ kơ bruă ti krĭng Lăn Dap Kngư./.

VOV Tây Nguyên/Pô Mblang: H’Zawut