Hlăm boh sang prŏng êbeh 30 m2 ti alŭ Phước Hòa 1, să Êa Kuang, kdriêk Krông Pač, čar Dak Lak, hlăm brô dŭm pluh čô amai adei dôk bi msiam pŏk thiệp lehanăn rup m’ar. Mơ̆ng kiê kngan mbruă phung amai, dŭm pŏk hră dlông mâo lu êa mil dưi mkra mjing dŭm mta mnơ̆ng mâo mô-tơ mini, mkra dŭm pŏk rup siam mdê mdê. Hdră mkra rup m’ar, pia klei Angle jing Quiling yua mjing mnơ̆ng bi msiam, mnơ̆ng bi hdơr msĕ si mnơ̆ng dưm ti kliăng, truh kơ thiệp, rup dưm ti mtih amâo dah mnơ̆ng yua bi msiam mkăn. Bruă dlăng msĕ ênưih ƀiădah čiăng klei kreh kriăng, mbruă mơ̆ng pô ngă. Amai Nguyễn Thị Bích Thuận, dôk ti să Êa Phê, kdriêk Krông Pač, mă bruă tinei êbeh 2 thŭn.

Mrâo hriăm dleh êdi, dlăng đa sa hruê pô ngă ka truh mơh sa pŏk thiệp, ƀiădah pô hriăm ƀrư̆ ƀrư̆ dưi mơh. Klei anei brei pô thâo mĭn mrâo mơh đa. Mbĭt anăn, tơ drei gĭr hriăm, mđing srăng dưi ngă yơh. Jih sa čô mă bruă sui leh, amai Mùi ăt ktrâo lač lu mơh ƀiădah yuôm hĭn kbiă hriê mơ̆ng klei kriăng drei pô.

Pô ktrâo lač kơ phung amai adei mniê tinei jing amai Lê Thị Mùi, khua anôk bruă. Hlăm 5 thŭn êgao, amai Mùi mtô leh bruă lehanăn mjing bruă mă kơ giăm 30 čô mniê mâo klei hdĭp dleh dlan ti să Êa Kuang lehanăn să djiêu gah. Hlăm anăn, mâo 3 čô amai amâo jăk asei mlei lehanăn sa čô amai mâo klei ruă dôk bi êran kboh êbeh 10 thŭn hŏng anei. Di amai dưi nao mă bruă ti anôk bruă mtam amâo dah mă mnơ̆ng hnêč mkra ti sang, hŏng ênoh hrui wĭt mơ̆ng 2 truh 5 êklăk prăk/mlan. Amai Mó May, ti alŭ Tân Lập, să Êaa Kuang, kdriêk Krông Pač brei thâo, bruă anei amâo suaĭ ôh dưi hnêč mmông wăn, djŏ guôp hŏng phung amai adei mniê mâo anak điêt.

Kâo dôk ti sang kăn mâo bruă, amâo kbiă prăk, mă bruă anei lŏ mâo ƀiă hnư hrui wĭt kơ gŏ sang. Phung amai adei mâo anak điêt ngă bruă anei dul mơh ƀiă.

 Amai Lê Thị Mùi brei thâo, mơ̆ng thŭn 2018, siă suôr hŏng bruă mkra rup hŏng m’ar. Mâo Êpul bruă mniê să Êa Kueng brei čan 20 êklăk prăk, mbĭt hŏng prăk brei čan 50 êklăk prăk mơ̆ng Knơ̆ng prăk đru ba yang ƀuôn, amai ngă mtam hdră kčah mă bruă mơ̆ng pô. Thŭn 2020, hŏng klei đru mơ̆ng Êpul bruă mniê Dak Lak, amai Mùi nao hlăm klei bi lông mphŭn čô̆ kơ bruă mơ̆ng čar lehanăn mâo klei pah mni mrô 2, mâo klei đru prăk kăk čiăng duh kơ bruă pô. Truh thŭn 2021, hdră mphŭn čô̆ kơ bruă mkra rup hŏng m’ar mơ̆ng amai dưi mŭt hlăm tuôr knhal tuič Klei bi lông phung mniê mphŭn čô̆ kơ bruă kluôm ala tal 4 lehanăn dưi mâo klei pah mni Klei čang hmăng. Dŭm boh tŭ anei jing boh kdrŭt đru kơ amai lŏ mâo prăk duh bi liê, mđĭ klei thâo lehanăn hưn mthâo mnơ̆ng pô čiăng pŏk mlar wăl anôk mnia mblei, tui duah ƀĭng hgŭm. Amai Lê Thị Mùi brei thâo:

Ară anei mâo 30 čô mă bruă, dôk mđĭ kyar ti Dak Lak lehanăn Kon Tum, Gia Lai. Hdră êlan kơ anăp jing lŏ dơ̆ng tŭ mă klei kuôl kă blei mnơ̆ng lehanăn mjing dŭm mta mnơ̆ng siam, jăk mơ̆ng krĭng wăl, jiă knhuah dhar kreh djuê ana Việt Nam čiăng hưn mthâo kơ ƀĭng găp hlăm ala čar lehanăn ala tač êngao, boh nik anôk bruă hiu čhưn ênguê lehanăn srăng pŏk mlar lehanăn mjuăt bi hriăm thiăm mnuih mă bruă ti dŭm krĭng djiêu gah.

Ară anei, grăp mlan anôk bruă amai Mùi mkra hlăm brô 5 êbâo mta mnơ̆ng djăp mta, mơ̆ng pŏk thiệp dŭm pluh êbâo truh rup lăn mnga êa m’ak mâo ênoh dŭm êklăk prăk. Dŭm mta mnơ̆ng anei dưi ba čhĭ ti wăl anôk mnia mblei hlăm lehanăn êngao čar. Mbĭt anăn, amai Mùi lŏ mkra rup prŏng, siam kơ dŭm anôk bruă pprŏng mkăn.

 H'Yer Knul, Khua êpul bruă mniê kdriêk Krông Pač tĭng dlăng: Gru hmô mphŭn čô̆ kơ bruă mkra rup hŏng m’ar mơ̆ng amai Lê Thị Mùi jăk êdi, mjing bruă mă lehanăn hnư hrui wĭt kơ lu amai adei, wăt mnuih amâo jăk asei mlei. Êpul akâo kơ Anôk bruă sang čư̆ êa kdriêk ƀrư̆ mkŏ mjing, đru kơ wăl anôk ngă bruă, pŏk mlar gru hmô anei, đru anôk hrui blei mnơ̆ng dhơ̆ng. H'Yer Knul bi mklă:

Khădah dôk dleh dlan ƀiădah hŏng klei khăp m’ai kơ bruă lehanăn klei hur har kơ bruă čiăng đru kơ phung amai adei mâo klei hdĭp dleh dlan snăn amai Lê Thị Mùi gĭr jih ai tiê čiăng dưi ngă jăk bruă pô. Gru hmô anei mâo leh bruă Đảng kdriêk bi mni lehanăn kơ anăp anei srăng gĭt gai êpul bruă mniê mâo hdră msir, hdră mtrŭn jăk găl kơ gru hmô. Hmei mđing lehanăn mtrŭt mđĭ čiăng gru hmô anei dưi bi lar.

Hŏng hdră êlan čiăng pŏk mlar wăl anôk mnia mblei, bruă phŭn mđing truh kơ wăl anôk hiu čhưn ênguê lehanăn ala tač êngao. Amai Lê Thị Mùi ƀrư̆ ƀrư̆ bi mrâo lehanăn lu jơr mnơ̆ng dhơ̆ng pô mkra. Mbĭt anăn, mđĭ hdră hưn mthâo, ruah êpul kăp hưn mthâo hŏng wăl anôk mnia mblei boh nik anôk blei mnia điện tử. Hdră anei srăng đru kơ anôk bruă nah gŭ ƀrư̆ ƀrư̆ mñă klă anăn knăl lehanăn mjing wăl anôk mnia mblei prŏng hĭn, mơ̆ng anăn đru kơ amai adei mđĭ hnư hrui wĭt, mkra mđĭ klei hdĭp jăk siam hĭn./.