Phạm Tuấn Anh, Khua Knơ̆ng bruă lŏ hma leh anăn mđĭ kyar ƀuôn sang čar Dak Nông brei thâo, mơ̆ng mlan 9/2019 truh akŏ mlan 10/2022, kluôm čar mâo 113 čô knuă druh ngă bruă răng mgang dliê akâo mdei bruă, 35 čô mnuih akâo mă bruă mkăn. Ênoh mnuih mdei bruă leh anăn nao mă bruă mkăn mâo truh 20% jih jang ênoh knuă druh, mnuih mă bruă ti dŭm anôk bruă dliê kmrơ̆ng, anôk kriê dlăng dliê kmrơ̆ng leh anăn dŭm knơ̆ng bruă dliê kmrơ̆ng mơ̆ng knŭk kna.

Bruă mâo lu knuă druh răng mgang akâo mdei bruă ba klei kpĭ prŏng kơ bruă kriê dlăng răng mgang dliê ti Dak Nông, hlăk êpul mă bruă ƀiă ƀiădah ngă lu mta bruă, kriê dlăng alŭ wăl hŏng ênhă dliê prŏng. Boh klei anei ăt hmăi kơ ai tiê phung dôk mă bruă, ƀrư̆ hruê mâo lu phung mdei bruă amâodah bi mlih bruă mă. Čiăng gang mkhư̆ klei anei, Tuấn Anh brei thâo, Knơ̆ng bruă lŏ hma leh anăn mđĭ kyar krĭng ƀuôn sang srăng kčĕ kơ čar dŭm hdră msir đru, mđĭ ai phung mă bruă răng mgang dliê; ƀiădah kơ hnơ̆ng sui, knŭk kna brei mâo hdră êlan kñăm mkra mđĭ prăk hrui wĭt, hnơ̆ng đru kơ mnuih mă bruă hơĭt ai tiê răng mgang dliê./.