Dôk ti djiêu war rông bê êbeh 20 drei, Quách Thiện, Alŭ Dak Rmo, Să Dak Ndrung, kdriêk Dak Song, čar Dak Nông hơ̆k kdơ̆k brei thâo, rông bê đru kơ gŏ sang ñu lŏ mâo hnư hrui wĭt. Gŏ sang ñu hriê hdĭp tinei mơ̆ng thŭn 2006, mâo lu anak čô lehanăn kƀah lăn pla mjing kyua anăn lĕ hlăm klei ƀun nanao. Akŏ thŭn 2020, ƀuh gŏ sang ñu dleh dlan, phung đảng viên hlăm alŭ lehanăn să đru gŏ sang ñu 4 drei bê mjeh, mbĭt anăn đru ñu mkra war rông, ktrâo lač kơ hdră mnêč rông, gang mkhư̆ klei ruă čiăng lŏ mâo hnư hrui wĭt. Êpul bê gŏ sang ñu đĭ prŏng pral, hlăm thŭn tal êlâo ba wĭt leh kơ ñu êbeh 10 êklăk prăk lehanăn thŭn anei giăm 50 êklăk prăk. Mbĭt anăn, phung đảng viên hlăm să, kdriêk đru kơ Thiện mŭt mă bruă ti sa anôk bruă lŏ hma ti alŭ wăl. Mơ̆ng anăn, klei hdĭp gŏ sang ñu ƀrư̆ h’ĭt kjăp, tlaih kơ ƀun: “Bê pô brei ƀơ̆ng hla kyâo, amlơ̆k hŏng rơ̆k ktơ̆k đuič. Ară anei, êpul bê đĭ prŏng pral, dŭm drei prŏng kâo lui ngă mjeh. Lač jăk kơ bruă sang čư̆ êa alŭ wăl đru leh kơ kâo dul ƀiă klei dleh dlan”.

Đru kơ gŏ sang Quách Thiện jing êpul 5 čô đảng viên, mâo wăt anôk bruă đảng alŭ, să lehanăn bruă Đảng kdriêk. Lương Quốc Lam, Khua bruă Đảng alŭ Dak Rmo, brei thâo, mbĭt hŏng gŏ sang Quách Thiện, lŏ mâo 4 gŏ sang ƀun mkăn hlăm alŭ dưi đru mơ̆ng gru hmô “5 đảng viên đru kơ 1 gŏ sang tlaih ƀun. Lam ăt đru kơ gŏ sang Quách Thiện, ñu ƀuh, ksiêm dlăng klei găl mâo, klei čiăng mơ̆ng dŭm gŏ sang ƀun, hdră đru jing čiăng êdi, kñăm ba wĭt klei tŭ dưn: “Gŏ sang ƀun lu jing kƀah hdră duh ƀơ̆ng, prăk duh bi liê lehanăn hdră mnêč ngă bruă. Dŭm thŭn êgao, bruă đảng lehanăn anôk bruă djŏ tuôm ăt hluê ngă jăk hdră mtrŭn “5 đảng viên đru kơ 1 gŏ sang tlaih ƀun, ƀuh klei tŭ dưn jăk êdi. Dưi đru kơ hdră duh ƀơ̆ng kyua anăn diñu dưi tlaih kơ ƀun h’ĭt kjăp mơh”.

Vương Thị Hiền, K’iăng khua anôk bruă mặt trận să Dak Ndrung, kdriêk Dak Song, čar Dak Nông, brei thâo, leh 2 thŭn pŏk ngă, gru hmô “5 đảng viên đru kơ 1 gŏ sang tlaih ƀun” ba wĭt leh klei tŭ dưn. Ară anei, kluôm să mâo 52 gŏ sang ƀun mâo phung đảng viên đru. Hŏng klei đru anei, mơ̆ng alŭ truh kơ să, kdriêk, mbĭt hŏng klei hgŭm mơ̆ng anôk bruă duh mkra, phung mâo ai tiê kmah, kyua anăn mđing êdi kơ hdră đru kơ gŏ sang ƀun. Phung đảng viên amâo djŏ knŏng đru kơ ana mjeh, êđai mjeh, hdră rông ƀiădah lŏ ksiêm dlăng, tui duah anôk hrui blei mnơ̆ng kơ gŏ sang ƀun. Dŭm gŏ êsei ƀun mâo ktrâo lač klă klơ̆ng, kyua anăn mâo boh kdrŭt kơ mnơ̆ng dhơ̆ng lehanăn wăt ai tiê klei mĭn čiăng mâo klei găl kpưn đĭ. Să ăt bi mklă bruă đru anei jing čiăng êdi, đru kơ gŏ sang ƀun tlaih kơ ƀun h’ĭt kjăp, amâo bi tiŏ êran ƀiădah brei mđing kơ hnơ̆ng tŭ jăk: “Klă sĭt klei hdĭp mơ̆ng mnuih ƀuôn sang dôk dleh dlan, diñu dôk kƀah lu mta kyua anăn drei amâo bi tiŏ êran ôh ƀiădah mđing kơ hnơ̆ng tŭ jăk. Kyua, sa gŏ sang ƀun brei drei đru hlăm lu mta, amâo djŏ knŏng đru prăk duh bi liê dưi tlaih yơh ƀun. Čiăng bi hrŏ klei lŏ wĭt ƀun, alŭ wăl brei bi mklă, tơdah đru srăng đru hŏng jih hnơ̆ng, đru kơ djăp mta bruă, čiăng diñu klă sĭt tlaih kơ ƀun”.

Hŏng klei hgŭm kngan mơ̆ng dŭm gưl, dhar bruă, boh nik mơ̆ng phung đảng viên hluê gru hmô “5 đảng viên đru kơ 1 gŏ sang tlaih kơ ƀun”, lu gŏ sang ƀun ti să Dak Ndrung, kdriêk Dak Song hgŭm kngan gĭr ktưn kpưn đĭ, klei hdĭp ƀrư̆ h’ĭt kjăp. Klei anei brei ƀuh, kdriêk Dak Song bi mklă leh djŏ gru hmô lehanăn nao djŏ hdră hlăk tui hriăm lehanăn hluê ngă klei mĭn, knhuah hdĭp, gru mngač Hồ Chí Minh hlăm hdră msir klei ư̆ êpa, bi hrŏ klei ƀun./.