Hluê hdră kčah, leh mkŏ dăp, kluôm ala srăng dôk 34 anôk bruă knŭk kna gưl čar, mâo 6 ƀuôn prŏng hlăm Gưl dlông lehanăn 28 čar. Lu klei blŭ lač, bruă mkŏ dăp anôk bruă knŭk kna gưl čar tal anei amâo djŏ knŏng bi hrŏ gưl krah wah jing gưl kdriêk čiăng kơ hdră ngă bruă khuăt hĭn, ƀiădah lŏ mjing wăl anôk kjăp ktang, bi mguôp klei jăk găl mơ̆ng grăp krĭng kwar (wăt krĭng čư̆ čhiăng lehanăn krĭng êa ksĭ).

Hluê si klei gĭt gai mơ̆ng Phŭn bruă kđi čar, mơ̆ng hruê 1-7 kơ anăp, srăng ba yua anôk bruă knŭk kna mrâo mkŏ dăp, hŏng gru hmô bruă knŭk kna 2 gưl, mâo gưl čar lehanăn gưl să. Knŭk kna mñă anei amâo djŏ knŏng jing bruă mkŏ dăp wĭt anôk bruă ƀiădah lŏ jing klei găl čiăng mlih mrâo, mđĭ klei thâo kriê dlăng, mjing tur knơ̆ng mtrŭt mđĭ hdră kah mbha gưl, klei dưi lehanăn mđĭ klei čŏng pô, tŭ đua klam mơ̆ng bruă knŭk kna alŭ wăl./.