Hlăm 2 mlan mdei prŏng, phung hđeh wĭt kơ ƀuôn sang, nao hlăm klei mdei klă sĭt.

 “Kâo jing H’Minzi, hriăm adŭ 3, sang hră gưl 1 Phan Chu Trinh. Hlăm yan mdei prŏng, kâo čiăng tui hriăm kdŏ muiñ. Kâo mơak snăk mŭt hriăm adŭ anei.”

Bi adei H Julie Byă, 8 thŭn, mơ̆ng Buôn Ma Thuột wĭt mdei prŏng ti Ea Tul:

“Kâo jing H’ Julie, hđeh hriăm hră sang hră Victory. Yan mdei prŏng anei kâo wĭt kơ ƀuôn nao mŭt hriăm adŭ hriăm klei Angle mbĭt hŏng ƀĭng găp hlăm ƀuôn. Kâo lŏ nao kơ hma, nao mă kan hdang mbĭt hŏng amĭ ama. Kâo mơak snăk”.

Nao hlăm klei hriăm yan mdei prŏng anei. Phung hđeh mâo hriăm kơ dhar kreh, kơ mnơ̆ng ƀơ̆ng huă djuê ana Êđê, hriăm klei Angle pioh blŭ hrăm hŏng mnuih ala tač êngao, snăn mâo leh mbĭt hŏng hđeh hriăm hră djuê lar lehanăn djuê ƀiă nao hriăm.

Adei Nguyễn Chính Quân, sang hră gưl sa Lê Qúy Đôn, să Čư̆ Dliê Mnông, kdriêk Čư̆ Mgar, čar Dak Lak, lač:

 “Hriê hŏng adŭ yan mdei prŏng anei kâo mơak snăk, mâo hriăm lu mta klei mrâo, kâo hriăm atăt hdră mơ̆ng phung hđeh. Kâo čang hmăng hŏng adŭ hriăm anei lŏ mâo hriăm lu mta mkăn”.

Đru kơ phung hđeh hlăm yan mdei prŏng hŏng klei tŭ dưn, lehanăn klă sĭt jing klei jăk mơak mâo phung amĭ ama hđeh čang hmăng. Anei yơh jing klei H Rut Niê, ti ƀuôn Ky, Ƀuôn hgŭm Thành Nhất, ƀuôn prŏng Buôn Ma Thuôt, čar Đắk Lắk, mtrŭt anaok pô nao hriăm:

           “Hlăm yan mdei prŏng anei, kâo čang hmăng kơ anak kâo srăng mâo hriăm lu mta klei tŭ dưn hlăm klei hdĭp, msĕ si hriăm piano, tông hgơr, amâodah hriăm klei Angle, klei Êđê mbĭt hŏng ƀĭng găp. Klei anei jing jăk lehanăn srăng đru kơ anak pral kdal hĭn hlăm klei thâo blŭ tlao grăp hrue”.