Ti kdriêk Lạc Dương, hlăm mlan 11 anei srăng mâo 2 hdră mđing truh kơ Festival Mnga Đà Lạt tal IX thŭn 2022. Klă klơ̆ng, hruê 19.11, srăng pŏk Knăm m’ak Đang rơ̆k hrah mda Lang Biang.  Tinei, srăng bi msiam 5 wăl anôk mnga đ’điêt mơ̆ng dŭm anôk bruă hiu čhưn, mbĭt anăn mkŏ mjing klei hlăp lêñ djuê ana, hdră Team Building djŏ tuôm kơ bruă dhar kreh êpul êya mnuih K’ho. Hruê 26/11, ti să Dă Ñim srăng mkŏ mjing Klei bi lông tŭk knă êsei djam lehanăn mkra kpiê čeh Lang Biang tal 1, mâo 6 êpul bi lông. Ăt wưng anei, tinei srăng mkŏ mjing Klei bi lông bi tiŏ êran aseh tal 1, ruah 32 drei aseh mơ̆ng 6 să, wăl krah lehanăn dŭm anôk bruă duh mkra ti alŭ wăl. Sử Thanh Hoài, Khua anôk bruă sang čư̆ êa kdriêk Lạc Dương, čar Lâm Đồng brei thâo, hdră mprăp kơ 3 bruă mđing truh kơ Festival Mnga Đà Lạt tal IX thŭn 2022 dưi ngă ruê̆ leh: “Hluê ngă Hdră mtrŭn mơ̆ng Anôk bruă sang čư̆ êa čar kơ bruă alŭ wăl nao hgŭm hlăm hdră mđing truh kơ Festival Mnga Đà Lạt, kdriêk Lạc Dương ăt mâo lu bruă mđing truh. Anăn jing knăm m’ak rơ̆k hrah mda pŏk hlăm hruê 9/11, mbĭt anăn kdriêk Lạc Dương ăt mkŏ mjing klei bi lông tŭk knă mnơ̆ng ƀơ̆ng huă, tông čing čhar, bi hgŭm hŏng anôk bruă duh mkra mkŏ mjing knăm bi tiŏ êran aseh ti să Dă Ñim”.

Ară anei, dŭm anôk bruă hiu čhưn ênguê msĕ si anôk đih đăm, mdei săn, anôk hiu čhưn… ti Lâm Đồng mprăp leh djăp ênŭm kăp drông tuê. Đinh Thiên Long, khua sa anôk bruă đih đăm ti ƀuôn prŏng Đà Lạt brei thâo, mđing truh kơ Festival Mnga Đà Lạt tal anei, êngao mđĭ hnơ̆ng tŭ, anôk bruă ñu mprăp leh dŭm mta mnơ̆ng dưi mkra mjing mơ̆ng djam mtam, boh kroh, jiă knhuah Đà Lạt. “Êlâo Festival bruă tal êlâo jing mđĭ hnơ̆ng tŭ jăk anôk bruă, rơ̆ng klei doh êƀăt mnơ̆ng dhơ̆ng čiăng drông tuê hiu čhưn. Đà Lạt mâo phŭn mkăp mnơ̆ng dhơ̆ng lu jơr, kyua anăn kâo čiăng phung tuê dưi tui ksiêm kơ dhar kreh mnơ̆ng ƀơ̆ng huă mơ̆ng mnuih ƀuôn sang ƀuôn prŏng mnga”.

 Tôn Thiện San, Khua anôk bruă sang čư̆ êa ƀuôn prŏng Đà Lạt, Khua anôk bruă mkŏ mjing Festival Mnga Đà Lạt tal 9 brei thâo, dŭm ƀuôn mnga, wăl anôk mnga ti Đà Lạt rơ̆ng kjăp klei siam, mkăp kơ klei čiăng dlăng mơ̆ng phung tuê hiu čhưn “Đà Lạt bi mklă amâo djŏ knŏng Festival mnga kơh mâo mnga, ƀiădah Đà Lạt jing ƀuôn prŏng mnga kyua anăn mnga mâo nanao jih thŭn mlan. Dŭm ƀuôn mnga thŭn anei mâo mnga siam nanao, msĕ si ƀuôn mnga Vạn Thành, phung tuê dưi nao čhưn dlăng mlam. Dŭm hdră Festival mnga srăng sui truh kơ hruê Têt, mâo hdră kčah dlăng kriê, mlih mnga nanao, čiăng kơ mnga dưi mtah, siam. Snăn, êngao hdră “Krĭng lăn siam Lăn dap kngư” srăng mâo sui, dŭm wăl anôk mnga ăt srăng dôk mâo truh kơ hruê Têt.

Ăt msĕ hŏng Festival Mnga gưl êlâo, Festival Mnga Đà Lạt tal 9 mđing truh kơ klei đru mơ̆ng yang ƀuôn, kyua lu hdră mâo anôk bruă duh mkra mkŏ mjing, dŭm êpul, mnuih bi mklă hluê ngă. Hluê Đặng Trí Dũng, K’iăng khua anôk bruă sang čư̆ êa čar Lâm Đồng, K’iăng khua anôk bruă mkŏ mjing Festival Mnga Đà Lạt, truh ară anei, dŭm hdră dưi mprăp djăp ênŭm lehanăn djŏ hdră, rơ̆ng sa wưng Festival Mnga jăk siam, mdưm hlăm ai tiê mnuih nao dlăng. Mơ̆ng anăn, đru mtrŭt mđĭ hdră hiu čhưn lehanăn mđĭ klei hdĭp dhar kreh, ai tiê klei mĭn mơ̆ng mnuih ƀuôn sang alŭ wăl. “Truh ară anei, bruă mkăp kơ hdră anei dưi ngă djŏ hdră kčah wăt kơ wưng lehanăn mta phŭn. Anôk gĭt gai, anôk mkŏ mjing lehanăn 4 êpul đru bruă pŏk ngă leh ênŭm bruă pô. Festival mnga thŭn anei mâo lu mta phŭn, mâo đa đa mta phŭn leh Festival srăng lŏ pŏk ngă, mâo mơh mta phŭn msĕ si hdră rang mdah klei kdŏ mmuñ srăng lui hlăm ai tiê phung tuê hiu čhưn dŭm gru kruăk jăk siam kơ Đà Lạt, kơ Lâm Đồng, kơ anak mnuih, kơ dŭm mta mnơ̆ng dhơ̆ng djŏ tuôm kơ Mnga”.

Hŏng mta phŭn "Đà Lạt – ƀuôn prŏng 4 yan mnga”. Festival Mnga Đà Lạt tal 9 thŭn 2022 mkŏ mjing mơ̆ng mlan 11 truh kơ mlan 11 hŏng wăl anôk prŏng dưi mkŏ mjing lu hdră ti dŭm kdriêk, ƀuôn prŏng hlăm čar. Mbĭt hŏng 9 hdră bruă, mâo: Wăl anôk mnga, hdră kdŏ mmuñ "Bảo Lộc – Mnâo ƀâo mngưi čê, klei jăk siam mơ̆ng mrai mnal eh hluăt”, hdră kdŏ mmuñ hưn mthâo Festival Mnga Đà Lạt tal 9 thŭn 2022, rang mdah kdrăp čŭt h’ô “Mrai mnal eh luăt – ktuê êlan knhuah gru” lehanăn Wăl anôk rang mdah “Klei jăk siam krĭng Lăn dap kngư”, rang mdah mnga lehanăn ana kyâo bi msiam, klei bi kƀĭn pŏk Hdră ngă bruă mơ̆ng Knŭk kna hluê ngă Hdră mtrŭn mrô 23 mơ̆ng Phŭn bruă kđi čar ơ hdră mđĭ kyar bruă duh mkra – ala ƀuôn, rơ̆ng klei êđăp ênang krĭng Lăn dap kngư truh kơ thŭn 2030, hnơ̆ng trah dlăng truh thŭn 2045 lehanăn mtrŭt mđĭ hdră duh bi liê krĭng Lăn dap kngư./.