Tlam mbruê 4/11, Bruă Đảng čar Gia Lai mkŏ mjing klei kƀĭn ksiêm wĭt 5 thŭn hluê ngă hdră mrô 38 mŏng Êpul khua bruă Đảng čar, hluê ngă asăp mtrŭn mrô 13 CT/TW mơ̆ng Êpul khua bruă Đảng kơ bruă mđĭ hĭn klei gĭt gai mơ̆ng Đảng hŏng bruă kriê dlăng, răng mgang leh anăn mđĭ kyar dliê hlăm alŭ wăl.

Hluê si klei hưn hlăm klei kƀĭn, truh kơ ară anei, čar Gia Lai dưi ngă leh bruă ksiêm dlăng, mkra mlih hdră čuăl mkă 3 mta dliê truh ti thŭn 2025, tă hdră truh ti thŭn 2030, mkŏ mjing klei găl hlăm bruă kriê dlăng, răng mgang dliê hlăm alŭ wăl. Čar dưi iêo mthưr êbeh 1000 êklai prăk mơ̆ng ngăn prăk tla kơ bruă răng mgang dliê. Dŭm knơ̆ng bruă, gŏ sang, grăp čô nao hgŭm pla êbeh 24.000 ha dliê pioh mă kyâo.

Ƀiădah, bruă kriê dlăng, răng mgang dliê ti čar Gia Lai ăt dôk mâo lu klei dleh dlan kyua amâo mâo djăp ngăn prăk mkă hŏng hdră kčah, lu ênhă dliê arăng bi rai, plah mmiă lăn dliê dôk mâo lu, lu ênhă dliê arăng bi rai kjham.

Čar Gia Lai gĭr ktưn truh ti thŭn 2025 srăng mđĭ hnơ̆ng guôm êyui mâo 47,75%. Grăp thŭn pla mrâo 8000 ha dliê leh anăn pla mjing ana êa drao ti gŭ êyui dliê.