Nao hlăm gưl tui duah, kuai mă, ba wĭt klang lĭng kahan djiê êngiă gưl anei mâo giăm 70 čô knuă druh, lĭng kahan êpul K52, adŭ bruă kđi čar, knơ̆ng gĭt gai lĭng kahan čar Gia Lai, dưi mbha jing dŭm êpul, mkŏ mjing klei tui duah 3 kiêng ti 3 čar Vihear, Stung Treng leh anăn Ratanakiri, ala mtao Campuchia.

Mmông tui duah mơ̆ng ară anei truh kơ jih yan bhang thŭn 2022 – 2023. Hŏng klei gĭr grăp êpul srăng duah ƀuh mơ̆ng 7 – 10 klang lĭng kahan djiê êngiă kơ dlông. Anei jing gưl tal 22 Êpul K52 nao ngă bruă klam.

Hlăm 21 gưl êlâo, Êpul dưi duah ƀuh, ba wĭt dơr 1.446 klang lĭng kahan, phung thơ̆ng kơ bruă mơ̆ng Việt Nam djiê êngiă hlăm dŭm klei bi blah ti Campuchia.