Gưl Khua knŭk kna Phạm Minh Chính nao čhưn mâo lu klei tŭ dưn yuôm bhăn, ba klei bi hgŭm knhuah gru plah wah Việt Nam hŏng Poland, Séc leh anăn Switz mŭt hlăm wưng đĭ kyar mrâo, mđĭ hnơ̆ng bi hgŭm, mđĭ klei bi đăo knang kđi čar. Khua knŭk kna Phạm Minh Chính mâo leh êbeh 30 klei bi trông, bi tuôm, bi blŭ hrăm hdră êlan, nao hlăm klei bi kƀĭn bruă duh mkra, nao hlăm hdră “Yan mnga ƀuôn sang”, nao čhưn ti dŭm anôk bruă dhar kreh, kreh knhâo - hdră mnêč ti dŭm ala čar.

Hlăm êbeh 30 mmông ti Davos, Khua knŭk kna Phạm Minh Chính mâo leh hdră mă bruă lu snăk hŏng lu bruă lu tĭng leh anăn dua nah. Khua knŭk kna, khua gĭt gai lu Phŭn, dhar bruă leh anăn alŭ wăl blŭ hrăm hŏng lu êpul grup mrô sa hlăm 5 klei bi trông hlăm lu bruă phŭn, mơ̆ng kdrăp mrâo, klei thâo anak mnuih truh kơ êa drao, anôk bruă nah gŭ thâo mĭn, êa pui êwa čuh mtah leh anăn anôk bruă ngăn prăk.