- Ơ Nguyễn Đình Trung, Hdră mtrŭn mrô 23 mơ̆ng Phŭn bruă kđi čar dôk pŏk klei găl đĭ kyar kơ krĭng Lăn Dăp Kngư. Hŏng klei bhiăn hjăn kơ čar Dak Lak, si ngă klei hmăng hmưi mâo mơ̆ng hdră mtrŭn anei?

                 - Nguyễn Đình Trung: Dưi lač hdră mtrŭn mrô 23 mơ̆ng Phŭn bruă kđi čar jing sa knhuang yuôm bhăn leh anăn kdlưn hĭn hlăm klei đĭ kyar bruă duh mkra ala ƀuôn, rơ̆ng klei êđăp ênang ti krĭng Lăn Dăp Kngư, hlăm anăn mâo čar Dak Lak. Mbĭt hŏng hdră ngă bruă knŭk kna mrâo ba mdah, hlăm anăn klă klơ̆ng bi leh 23 bruă klam, 9 hdră duh bi liê kơ bruă mkŏ mkra mkŏ êlan klông dŭm alŭ wăl hlăm krĭng Lăn Dăp Kngư. Dak Lak jing sa čar hlăm krĭng Lăn Dăp Kngư leh anăn mâo bruă klam jing krĭng phŭn hlăm krĭng Lăn Dăp Kngư. Anei jing tur knơ̆ng yuôm bhăn pŏk lu klei găl kơ čar Dak Lak dưi bi lar, dưn yua mâo boh tŭ dưn hĭn dŭm klei găl, klei ktang, dưi găn klei dleh dlan, klei lông dlăng, mkŏ mjing knhuang mrâo leh anăn ktang hlăm bruă mđĭ kyar bruă duh mkra ala ƀuôn, rơ̆ng klei êđăp ênang.

Čar Dak Lak bi klă dŭm klei dleh dlan hlăm klei ngă bruă msĕ si: Klei kpĭ prŏng mơ̆ng klei ñŭ kma bruă duh mkra ti anôk mnia mblei boh mnga bruă lŏ hma. Tal 2, mnuih mă bruă lu ƀiădah mnuih mă bruă mâo hnơ̆ng tŭ jăk ka lu ôh. Boh klei tal 3, Dak Lak ăt dôk jing sa čar ƀun, ka mâo ôh ai dưi bi kna ngăn prăk, hnơ̆ng gŏ sang ƀun ƀin hlăm krĭng mnuih djuê ƀiă, krĭng dleh dlan ăt dôk lu, ngă đĭ hĭn klei amâo mâo hơĭt hlăm klei hdĭp yang ƀuôn…

-Sơnăn! Si ngă hdră tă mơ̆ng čar mâo leh čiăng dưi găn dŭm klei lông dlăng anăn, mđĭ lar ktang klei ktang pô čiăng hluê ngă tŭ jing hdră mtrŭn anăn?

                  -Nguyễn Đình Trung: Čar bi klă mjêč mkŏ mjing leh anăn hluê ngă kluôm êlam hdră ngă bruă mơ̆ng čar čiăng hluê ngă hdră mtrŭn mơ̆ng Phŭn bruă kđi čar, hluê ngă hdră ngă bruă mơ̆ng knŭk kna. Tal 2, bi leh bruă mkŏ mjing, hưn mdah, bi klă leh anăn hluê ngă tŭ dưn hdră čuăl mkă mơ̆ng čar Dak Lak wưng thŭn 2021 – 2030 leh anăn tă hdră truh ti thŭn 2050. Rơ̆ng klei čuăl mkra kluôm ala čar, čuăl mkă dhar bruă ala čar leh anăn čuăl mkă krĭng Lăn Dăp Kngư. Tal 3, lŏ dơ̆ng dưn yua tŭ dưn hĭn klei găl dôk mâo. Boh nĭk, knang kơ 4 kmeh gơ̆ng phŭn jing: Mđĭ kyar dŭm mta mnơ̆ng dhơ̆ng boh mnga bruă lŏ hma mâo klei găl prŏng, mđĭ kyar bruă mkra mjing boh mnga bruă lŏ hma, mnơ̆ng hlăm dliê, kan hdang leh anăn pui kmlă doh hnơ̆ng prŏng, mđĭ kyar bruă duh mkra ƀuôn prŏng, knơ̆ng kdơ̆ng êa, mđĭ kyar bruă logistic hluê si tur knơ̆ng mrô, bruă duh mkra mrô, yang ƀuôn mrô. Hlăm mđĭ kyar ƀuôn prŏng Ƀuôn Ama Thuôt jing anôk phŭn hlăm krĭng Lăn Dăp Kngư hluê si klei bi klă mrô 67 mơ̆ng Phŭn bruă kđi čar. Mbĭt anăn, čar srăng hyuă kjăp, mkŏ mjing klei sa ai hlăm dŭm gưl, dhar bruă kơ hnơ̆ng čoh čuăn mjêč hlăm bruă mtrŭt mđĭ klei bi mguôp krĭng, mkŏ mjing wăl krŭ wĭt, mgaih msir dŭm klei gun kpăk, mđĭ ai bi lông, bi ktưn, bi lar jih hnơ̆ng klei găl hlăm krĭng. Hluê ngă mâo boh tŭ dưn dŭm hdră êlan bi hơĭt klei hdĭp yang ƀuôn, kriê dlăng klei hdĭp mnuih ƀuôn sang, boh nik jing mnuih ƀuôn sang jing mnuih djuê ƀiă, rơ̆ng klei êđăp ênang hlăm alŭ wăl.

-Hlăm lu mbah đĭ kyar mơ̆ng krĭng Lăn Dăp Kngư, hluê ngă dŭm hdră jing yuôm bhăn sơnăk. Ƀiădah hlăm lu alŭ wăl hlăm krĭng, dŭm hdră prŏng tuôm hŏng lu klei dleh kpăk. Ti čar Dak Lak, si ngă boh klei anei, leh anăn si srăng ngă čiăng dưi “bi hluh mdơ̆ng mgăn” hlăm bruă hluê ngă dŭm hdră mkăp, mtrŭt klei đĭ kyar, rơ̆ng djŏ hdră kčah bi êdah leh hlăm hdră mtrŭn mrô 23?

                 -Nguyễn Đình Trung: Čiăng bi lar ktang hĭn boh tŭ ênoh prăk duh bi liê leh anăn mđĭ boh tŭ dŭm hdră kñăm đru bi tŭ jing hdră mtrŭn mơ̆ng Phŭn bruă kđi čar, čar Dak Lak ƀuăn srăng mđĭ hĭn ai tiê bruă klam, mkŏ mjing klei sa ai hlăm bruă hluê ngă, bi klă bruă klam mơ̆ng dŭm anôk bruă hlăm klei ngă bruă. Čŏng pô, ktang phĭt hlăm bruă hluê ngă dŭm bruă klam hlăm alŭ wăl. Mbĭt anăn, lŏ dơ̆ng bi mguôp kjăp hŏng dŭm anôk bruă gưl dlông, dŭm čar hlăm krĭng čiăng hluê ngă hdră. Hlăm klei iêo mthưr duh bi liê leh anăn hluê ngă dŭm hdră srăng kñăm kơ dŭm hdră êlan tŭ dưn čiăng iêo mkrum dŭm ênoh prăk duh bi liê kluôm yang ƀuôn čiăng duh bi liê kơ bruă mkŏ mkra bruă duh mkra kmeh gơ̆ng. Lŏ dơ̆ng bi leh hdră êlan iêo mthưr klei duh bi liê, mtrŭt mđĭ mlih mrâo klei ngă hdră mơar knŭk kna, bi hơĭt wăl duh bi liê, mđĭ hĭn bruă kriê dlăng mơ̆ng knŭk kna hŏng dŭm bruă duh bi liê. Mbĭt anăn dăp dŭm mta bruă tal êlâo čiăng dăp ai dưi duh bi liê tuč hnơ̆ng, hnưm dưi yua mâo boh tŭ dưn dŭm bruă mkŏ mkra, đru bi leh mta kñăm mđĭ kyar bruă duh mkra ala ƀuôn ba mdah leh, mơ̆ng anăn đru hlăm klei đĭ kyar mbĭt ti alŭ krĭng Lăn Dăp Kngư leh anăn wăt kluôm ala.

- Lač jăk kơ ih lu!