Tui si hdră, aguah anei phung bi ala bruă kƀĭn ala nao dưm leh kwang mnga, lehanăn nao čuă msat khua gĭt gai Hồ Chí Minh, êlâo kơ klei bi kƀĭn mprăp kơ klei trông čhai, lehanăn bi mklă jih jang hdră bi kƀĭn tal 4, Bruă kƀĭn ala gưl 15. Klei bi kƀĭn klă klơ̆ng pŏk hlăm 9h ti sang bi kƀĭn Diên Hồng – Sang bruă kƀĭn ala Hà Nội, lehanăn dưi hlŏng mđung asăp, mđung rup ti mmông anăn mtam, čiăng kơ jih jang mnuih tui mđing.

Ti anôk bi kƀĭn anei, bruă kƀĭn ala srăng ksiêm, bi mklă 7 mta klei čih mkra hdră bhiăn, mâo: Hdră bhiăn êa pui êwa čuh lŏ mlih mrâo; hdră bhiăn bi kdơ̆ng hŏng klei ngă jhat hlăm găp djuê lŏ mlih mrâo; hdră bhiăn ksiêm dlăng lŏ mlih mrâo; hdră bhiăn hlue ngă klei hnŭk êngiê nah gŭ; hdră bhiăn mlih mrâo, thiăm mbŏ đa đa mta kơ hdră êlan dăng kông êlan kbưil; hdră bhiăn mkă dlăng mdrao mgŭn lŏ mlih mrâo; hdră bhiăn bi kdơ̆ng hŏng klei mbliư̆ prăk lŏ mlih mrâo; Hdră mtrŭn kơ klei bhiăn bi kƀĭn hlăm bruă kƀĭn ala lŏ mlih mrâo. 3 klei čih mkra kơ hdră mtrŭn ăt ba ksiêm dlăng mâo: Hdră mtrŭn kơ bruă lông bi hmô mbha gưl klei dưi hrŏng ruah pô mkra mrô êdeh tui ngă hlue si klei bi lông ruah. Hdră mtrŭn kơ klei bi hmô kơ klei bhiăn, hdră êlan mđĭ kyar truăn hjăn kơ ƀuôn prŏng Ƀuôn Ama Thuôt, čar Daklak. Mbĭt hŏng anăn, bruă kƀĭn ala srăng mâo klei ksiêm gưl dlông, ksiêm bi mklă djăp mta bruă duh mkra ala ƀuôn lehanăn dŭm bruă yuôm bhăn mkăn kơ lăn čar./.