Kkiêng lehanăn đĭ hriê kơ prŏng hlăm sa gŏ sang dleh dlan ti să krĭng taih kbưi Dă K’Nang, kdriêk Dam Rông, čar Lâm Đồng, Ka Huệ brei hriăm hră hlăk adŭ 11, dôk ti sang mă bruă đru amĭ ama. Hlăk 17 thŭn, mniê êra Ka Huệ hur har kơ bruă duh mkra gŏ sang lehanăn nao hgŭm hlăm hdră đru kơ yang ƀuôn.

Ti să Dă K’nang lăn ala, yan adiê djŏ guôp hŏng bruă pla mtei Laba. Tlâo thŭn êlâo, Êpul hgŭm bruă Mtei Laba Dă K’Nang dưi mkŏ mjing, Ka Huệ duh leh 5 êbâo m2 lăn pla mtei bi hgŭm hŏng Êpul bruă. Ăt wưng anei, hŏng prăk mlan 7 êklăk prăk, amai lŏ mtrŭt mjhar 4 čô êdam êra mnuih djuê ƀiă hlăm să nao mă bruă tinei, mâo hnư hrui wĭt h’ĭt kjăp. Êngao kơ mmông mă bruă ti Êpul bruă anei, amai Ka Huệ jing khua bruă Đoàn ƀuôn Pul, ñu kreh hnêč jak iêo phung êdam êra hlăm ƀuôn bi mjĕ mjuk čiăng mtô mblang kơ hdră êlan mtrŭn mơ̆ng Đảng, hdră bhiăn mơ̆ng knŭk kna mbĭt anăn pŏk dŭm gru hmô mđĭ kyar bruă duh mkra tŭ dưn. “Hlăm hdră mtô mblang, hmei kreh yua asăp mtă mtăn mơ̆ng mnuih khua thŭn čiăng mtô mtă kơ phung hđeh. Mơ̆ng anăn, hmei gĭr mtô mblang nanao, čiăng kma ƀrư̆ ƀrư̆. Duah djăp hdră čiăng jak iêu ohung êdam êra hlăm ƀuôn hgŭm mguôp, mđing kơ bruă duh mkra, amâo ngă soh hŏng hdră bhiăn. Knhal jih mlan, Êpul êdam êra mkŏ mjing klei mjĕ mjuk čiăng đru mguôp klei blŭ, hưn mthâo gru hmô mă bruă tŭ dưn kơ phung đoàn viên. Msĕ kâo, kreh hluê ngă êlâo, ƀuh tŭ dưn srăng hưn kơ phung đoàn viên tui ngă. Tinei hmei pŏk ngă gru hmô pla boh teinan hruĕ, ară anei grăp sao pla boh teinan hruĕ lehanăn rông hluăt mrao kreh mâo mơ̆ng 7 truh kơ 10 êklăk prăk/mlan.

Jing khua bruă Đoàn pral kdal, ka Huệ lŏ jing knuă druh mdrao mgŭn alŭ – ƀuôn, mbĭt anăn lŏ jing sa čô mă bruă ksiêm dlăng ênoh mnuih. Alŭ Puh, să Dă Knang mâo 120 gŏ êsei, hlăm brô 80% jing mnuih K’ho. Kyua krĭng taih kbưi ăt dôk lu klei bhiăn mơ̆ng hđăp đưm. Ka Huệ kreh nao mtô mblang čiăng kơ ƀuôn sang lui jih klei bhiăn đưm amâo lŏ djŏ, msĕ si: Klei bi dôk ung mô̆ mơ̆ng điêt, klei bi dôk giăm sa êrah, mđĭ klei thâo săng hlăm hdră gang mkhư̆ klei ruă tưp, ƀơ̆ng mnăm mnơ̆ng leh tŭk ksă, bi mdoh wăl hdĭp mda.  “Kâo jing khua bruă Đoàn alŭ Pul lehanăn mă thiăm bruă mkăn đa. Êlâo adih ka mâo pô bruă ksiêm dlăng ênoh mnuih, amâo dưi đru kčĕ, amâo dưi mtô mblang snăn klei bi dôk ung mô̆ mơ̆ng mda, dôk giăm sa êrah mâo lu ti alŭ wăl. Ƀiădah leh mâo hdră mtô mblang, klei anei hrŏ lu. Phung êdam dôk mô̆, dôk ung djuê ana mkăn msĕ si Yuăn, Čĭl… Amâo lŏ dôk mnuih kkiêng anak tal 3, tal 4 msĕ êlâo, ară anei knŏng kkiêng 2 čô anak đuič čiăng ênưih rông ba. Tơdah bluh mâo klei ruă, mtrŭt mjhar nao tlŏ mgang, ƀuôn sang tui hmư̆ s’aĭ.

Hŏng klei gĭr, hur har kơ bruă, akŏ thŭn anei, Ka Huệ dưi mŭt Đảng Cộng sản Việt Nam. Aduôn Mbon K’Thơm K’iăng khua anôk bruă sang čư̆ êa să Dă K’Nang, kdriêk Dam Rông, čar Lâm Đồng brei thâo, dŭm thŭn êgao, Ka Huệ mâo leh klei bi hgŭm hŏng dŭm anôk bruă, să mđĭ hdră mtô mblang kơ mnuih ƀuôn sang bi mlih hdră mĭn, hdră ngă. Boh nik mtô brei lui klei bhiăn bi dôk ung mô̆ giăm sa êrah. Pŏk hdră kčah mkŏ mkra krĭng ƀuôn sang mrâo ti alŭ wăl, Ka Huệ lehanăn alŭ Pul mâo leh lu klei đru mguôp ba să Dă K’Nang bi leh hdră mkŏ mkra krĭng ƀuôn sang mrâo. “Ka Huệ jing sa čô Đảng viên mda asei, hur har kơ bruă, ăt jing khua bruă Đoàn, Ka Huệ ba akŏ nanao hlăm hdră mđĭ kyar bruă duh mkra čiăng phung đoàn viên, êdam êra hlăm alŭ, să tui hriăm. Alŭ wăl ăt bi mklă, ñu jing sa čô knuă druh Đoàn mâo klei thâo čiăng lŏ hriăm mjuăt mđĭ kyar hĭn hlăm anôk bruă Đoàn êpul êya mnuih djuê ƀiă.

“Ti anôk čiăng kơ êdam êra, tinăn srăng mâo êdam êra”, asăp mtă mơ̆ng Awă Hô dưi ênuk gưl hđeh ti să taih kbưi Dă K’Nang, kdriêk Dam Rông, čar Lâm Đồng hdơr nanao čiăng hluê ngă. Hlăm anăn, Ka Huệ - Khua bruă Đoàn alŭ Pul, să Dă K’Nang jing sa gru bi hmô jăk. Hdră mă bruă mơ̆ng ñu đru mguôp yuôm bhăn ngă bi mlih klei mĭn, bruă ngă kơ phung êdam êra ti alŭ wăl krĭng taih kbưi./.