Hŏng akŏ “Đà lạt – ƀuôn prŏng 4 yan mnga”,   Festival tal anei jing brưa lŏ čuê, bi klă, bi mni kơ phung pla mnga leh anăn hưn mdah klei yuôm bhăn mơ̆ng mnga, mơ̆ng dŭm mta boh mnga bruă lŏ hma jăk yâo ti Đà Lạt – Lâm Đồng msĕ si: djam mtam, čê, kphê, hluăt mrai.

Blŭ hrăm hlăm knăm pŏk, k’iăng Khua lăn čar Võ Thị Ánh Xuân lač klă Festival mnga Đà Lạt tal 9 jing knăm mơak, mâo klei hmăi klă klơ̆ng, pah mni klei siam mdê hjăn ti Đà Lạt, mtrŭt mđĭ bruă mkra mjing, mnia mblei, čhĭ mnia mnga, boh mnga bruă lŏ hma mâo anăn knăl “Đà Lạt boh tŭ dưn mơ̆ng lăn jăk”. K’iăng Khua lăn čar mñă klă, anei ăt jing mmông găl čiăng hưn mdah krĭng lăn Đà lạt jăk siam, anak mnuih mhač, khăp kơ phung tuê, đru mđĭ kyar bruă hiu čhưn ênguê, krŭ wĭt, mđĭ kyar bruă duh mkra ala ƀuôn wưng êdei klei ruă tưp Covid-19.