Hlăm mmông mă bruă, khua gĭt gai čar Khánh Hòa hưn hŏng Êpul mă bruă mơ̆ng Anôk bruă mkŏ mjing gưl dlông kơ boh klei duh mkra- ala ƀuôn, bruă mkŏ mjing Đảng 10 mlan thŭn 2024 leh anăn dŭm bruă klam yuôm bhăn hlăm wưng kơ anăp.

Blŭ hrăm hlăm mmông mă bruă, Khua Anôk bruă mkŏ mjing gưl dlông Lê Minh Hưng mtă kơ Anôk dlăng bruă Đảng čar Khánh Hòa mđing gĭt gai hlue ngă dŭm bruă klam phŭn hlăm wưng kơ anăp; Amâo mdei mlih mrâo hdră Đảng gĭt gai; Mđĭ ktang mkra mlih hră mơar hlăm Đảng; Mđĭ klei Đảng gĭt gai, boh nik jing klei Đảng gĭt gai hŏng bruă sang čư̆ êa, bruă mặt trận čar kwar leh anăn Êpul bruă kđi čar - ala ƀuôn, Mđĭ klei gĭt gai mơ̆ng Đảng hŏng bruă knuă druh; Hlue ngă bi jăk bruă klam phung ba anăp hlăm klei mkra mlih hră mơar leh anăn mkŏ mjing êpul mă bruă khuăt, ngă bruă tŭ dưn  ti anôk bruă, alŭ wăl.