Khua bruă kƀĭn ala Vương Đình Huệ mñă klă hlăm gưl nao čuă anei jing kñăm mtrŭt mđĭ leh anăn bi êlam hĭn klei mjĕ giăm Bi mguôp hdră êlan Việt Nam - New Zealand.

Hlăm mmông blŭ hrăm, 2 tĭng bi tŭ ư kơ bruă mđĭ hĭn klei bi mguôp bruă duh mkra – mnia mblei – duh bi liê, ba bruă anei jing boh kdrŭt mđĭ kyar klei mjĕ giăm 2 ala čar. 2 čô khua bruă Kƀĭn ala yap yuôm bhăn klei bi mguôp plah wah 2 anôk bruă klei bhiăn 2 ala čar. Mñă klă bruă klam yuôm bhăn, klă klơ̆ng mơ̆ng klei bi mguôp bruă kƀĭn ala hlăm bruă mđĭ klei mjĕ giăm dŭm ala čar. 2 tĭng bi tŭ ư ksiêm duah, mkŏ mjing sa klei kuôl kă bi mguôp plah wah 2 anôk bruă kƀĭn ala kñăm mkŏ mjing tur klei bhiăn kơ 2 tĭng dưi mđĭ leh anăn mtrŭn agha êlam hĭn klei mjĕ giăm hlăm wưng kơ anăp.