Hlăm klei bi tuôm, Khua bruă kƀĭn ala Vương Đình Huệ mñă kơ Khua knŭk kna Campuchia Hun Sen hŏng bruă klam jing Khua gĭt gai Đảng yang ƀuôn Campuchia, Khua knŭk kna ala mtao Campuchia lŏ dơ̆ng uêñ mĭn, gĭt gai mtrŭt mđĭ klei mjĕ giăm, klei bi mguôp kluôm ênŭm plah wah 2 ala čar. 

Hlăm anăn mâo klei bi mguôp bruă lĭng kahan, klei êđăp ênang, mnia mblei, duh bi liê, bruă lŏ hma, mtô mjuăt bi hriăm, hiu čhưn ênguê, mjĕ êrô mnuih ƀuôn sang, bi mguôp plah wah dŭm alŭ wăl, mkŏ mjing klei găl čiăng kơ mnuih ƀuôn sang phŭn mơ̆ng Việt Nam ti Campuchia mâo klei hdĭp hơĭt, đru mguôp hlăm klei đĭ kyar mdrŏng sah mơ̆ng Campuchia leh anăn klei mjĕ giăm 2 ala čar.