Tlam mmăt mbruê 24/10, ti sang bruă kƀĭn ala, Khua bruă kƀĭn ala Vương Đình Huệ gĭt gai leh knăm tŭ drông khua gĭt gai Thượng viện Samdech Say Chhum leh anăn êpul bi ala gưl dlông ala mta Campuchia. Leh knăm tŭ drông, 2 tĭng hlŏng ngă klei blŭ hrăm. Khua bruă kƀĭn ala Vương Đình Huệ leh anăn khua gĭt gai Thượng viện Campuchia Samdech Say Chhum yap klei hriê čuă anei jing bruă yuôm bhăn hlăm bruă bi kjăp klei mjĕ giăm, klei bi hgŭm, bi mguôp kluôm ênŭm plah wah Việt Nam – Campuchia ăt msĕ hŏng dŭm anôk bruă klei bhiăn 2 ala čar.

Khua bruă kƀĭn ala Vương Đình Huệ hmăng hmưi 2 ala čar hnưm bi leh “Klei čuăl mkă kluôm mkŏ bruă duh mkra Việt Nam – Campuchia truh ti thŭn 2030”. Lŏ dơ̆ng mkŏ mjing klei găl kơ phung duh bi liê grăp ala čar bi mguôp. Bi mguôp ksiêm dlăng leh anăn rơ̆ng klei êđăp ênang ti knông lăn, ksiêm dlăng kjăp čiăng gang mkhư̆ phung ngă soh leh anăn găn knông lăn soh hŏng hdră bhiăn, klei ngă soh čhĭ mnia mnuih. Bi kơ bruă kƀĭn ala Việt Nam leh anăn klei bi mguôp nghị viên plah wah 2 ala čar, 2 čô khua gĭt gai hmăng hmưi 2 tĭng rơ̆ng klei kha mbha klei hriăm hlăm bruă ksiêm duah, đru kčĕ leh anăn đru hlăm djăp mta bruă mơ̆ng Nghị viện, lŏ dơ̆ng bi lar klei bi mguôp hlăm dŭm klei kƀĭn lu tĭng.