Leh knăm tŭ drông, Khua bruă kƀĭn ala Vương Đình Huệ mâo leh klei blŭ hrăm hŏng khua gĭt gai Bruă kƀĭn ala nah dlông Prăng. Klei hriê čuă anei jing gru kruăk čiăng bi êlam, bi kluôm ênŭm leh anăn mâo boh tŭ dưn hĭn klei mjĕ giăm 2 ala čar. Hlăm mmông blŭ hrăm, 2 čô khua gĭt gai lač, hlăm wưng msĕ ară anei, 2 tĭng dưi mđĭ hĭn klei bi mguôp hlăm dŭm mta bruă msĕ si: mđĭ kyar kjăp, bruă pui kmlă, bruă mdrao mgŭn, klei ksiêm duah, kah mbha klei hriăm kơ bruă čih mkra klei bhiăn.

Khua bruă kƀĭn ala Vương Đình Huệ mñă kơ 2 tĭng mtrŭt mđĭ klei bi mguôp bruă lĭng kahan, klei êđăp ênang, hluê ngă mâo boh tŭ dưn dŭm klei kuôl kă bi klă leh, lŏ dơ̆ng mtrŭt mđĭ dŭm mta phŭn, mta bruă mrâo msĕ si klei bi mguôp bi trông leh anăn răng mgang klei čih pioh, ksiêm duah klei ruă krĭng hlơr.

Leh klei blŭ hrăm, Khua bruă kƀĭn ala Vương Đình Huệ leh anăn Khua gĭt gai bruă kƀĭn ala nah dlông Prăng Gérard Larcher hrăm mbĭt gĭt gai knăm pŏk dŭm mta bruă bi hdơr 50 thŭn hruê mkŏ mjing klei jĕ giăm 2 ala čar.