Tŭ klei iêo jak mơ̆ng Khua bruă kƀĭn ala Campuchia, Khua kiă kriê Êpul gơ̆ng Nghị Viện dŭm ala čar Ngŏ Dhŭng Asi (AIPA) Samdech Heng Samrin, Aguah anei 19/11, Khua bruă kƀĭn ala Vương Đình Huệ ba anăp êpul bi ala gưl dlông bruă Kƀĭn ala Việt Nam kčưm nao čuă klă klơ̆ng ala car Campuchia leh anăn nao hgŭm hlăm klei Kƀĭn Êpul gơ̆ng prŏng Nghị viện dŭm ala čar ASEAN tal 43 (AIPA-43) mơ̆ng hruê 19/11 truh ti hruê 22/11.

Klei nao čuă anei kñăm mtrŭt mđĭ klei bi mguôp jăk siam, klei bi hgŭm knuah gru, bi mguôp kluôm ênŭm, sui leh anăn kjăp plah wah 2 ala čar, ƀrư̆ hruê ƀrư̆ êlam, klă klơ̆ng leh anăn mâo boh tŭ dưn hĭn. Bi trông kơ hdră bi mguôp plah wah anôk bruă klei bhiăn 2 ala čar hlăm wưng kơ anăp hlăm hdră 2 tĭng leh anăn lu tĭng, bi trông kơ dŭm boh klei hlăm alŭ wăl leh anăn tar rŏng lăn 2 tĭng dôk uêñ mĭn.