Gưl nao čhưn klă sĭt ti Australia mơ̆ng Khua bruă kƀĭn ala Vương Đình Huệ srăng mđĭ klei bi hgŭm plah wah Bruă kƀĭn ala dua ala čar leh anăn mâo knhuang đĭ kyar mrâo, pŏk klei čang hmăng, mjing boh kdrŭt kơ klei bi hgŭm ƀrư̆ klă sĭt, tŭ dưn plah wah dua ala čar hlăm jih jang hdră, dŭm hdră bruă, ba klei tŭ dưn klă sĭt kơ ala ƀuôn dua ala čar. Hlăm wưng êgao, klei bi hgŭm đĭ kyar jăk siam.

Klei bi hgŭm kđi čar ƀrư̆ jĕ giăm, đăo knang mơ̆ng bruă bi trông êpul leh anăn bi tuôm hlăm dŭm gưl leh anăn dŭm bruă Đảng, bruă kƀĭn ala, Knŭk kna, mjĕ êrô yang ƀuôn. Bi hgŭm hlăm bruă duh mkra, mnia blei, duh bi liê mâo klei đĭ kyar jăk. Prăk hrui wĭt bruă mnia blei dua nah đĭ kyar ktang wăt tơdah hmăi kyua klei ruă tưp: Thŭn 2021 mâo 12,4 êklai USD, đĭ giăm 50% mkă hŏng thŭn 2020, Australia brei nanao kơ Việt Nam prăk ODA hơĭt kjăp. Mrâo anei, Australia hưn prăk knŭk kna thŭn 2022-2023, hlue anăn srăng mđĭ ODA kơ Việt Nam jing 92,8 êklăk AUD.