Hlăm mmông tŭ drông, Khua bruă kƀĭn ala Vương Đình Huệ lač, hruê mmông nao mbĭt leh anăn thâo săng klă kơ Việt Nam jing mta phŭn yuôm bhăn čiăng kơ pô bi ala dưi bi leh jăk bruă klam hlăm wưng păn bruă pô, đru mguôp mđĭ kyar klei mjĕ giăm, bi mguôp hdră êlan Việt Nam – Prăng leh anăn bi hgŭm, bi mguôp jăk siam plah wah bruă kƀĭn ala Việt Nam leh anăn Nghị viện Prăng.

Pô bi ala Nicolas Warnery lač, hlăm êbeh 2 thŭn êgao, khădah tŭ klei hmăi amâo jăk mơ̆ng klei ruă tưp Covid-19, ƀiădah hŏng klei kah mbha êlan online, Bruă kƀĭn ala Việt Nam leh anăn Nghị Viện Prăng, Êpul khua êmua bi hgŭm 2 ala čar ăt dưi rơ̆ng mâo boh tŭ klei bi trông, bi mguôp. Khua bruă kƀĭn ala Vương Đình Huệ lač klă, Việt Nam dlăng yuôm bhăn klei mjĕ giăm bi mguôp kluôm ênŭm hŏng Êpul hgŭm Ơrôp leh anăn Prăng, ăt msĕ hŏng dŭm ala čar hlăm EU, hmăng hmưi lŏ mâo klei sa ai mơ̆ng prăng hlăm bruă mtrŭt mđĭ ktang leh anăn mâo boh tŭ dưn hĭn klei bi mguôp Việt Nam – EU.